Փոխվարչապետն ընդունեց KfW բանկի պատվիրակությանը

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Գերմանական զարգացման բանկի (KfW) պատվիրակությանը` Հայաստանում Գերմանիայի արտակարգ եւ լիազոր դեսպան Հանս-Յոհան Շմիդտի գլխավորությամբ: Հանդիպմանը մասնակցում էին KfW բանկի տարածաշրջանային տնօրեն Ֆիլիպ Գրաֆ ֆոն Շվերը, ՀՀ ՏԿՆ ջրային տնտեսության պետական կոմիտեի նախագահ Անդրանիկ Անդրեասյանը:

Քննարկվեցին KfW բանկի ֆինանսավորմամբ Հայաստանում իրականացվող ծրագրերը:

Դեսպան Հանս- Յոհան Շմիդտը նշեց, որ Հայստանում իր դիվանագիտական առաքելության ավարտին ուրախ է այն վստահության համար, որ ծրագրերը, որոնք իրականացվում են Գերմանիա-Հայաստան ֆինանսական համագործակցության շրջանակում, կշարունակվեն: Նա շնորհակալություն հայտնեց իր դիվանագիտական գործունեության ընթացքում ցուցաբերված աջակցության համար:

Փոխվարչապետը նշեց, որ ՀՀ կառավարությունը կարեւորում է Գերմանիայի հետ հարաբերությունները եւ երկկողմ, եւ Եվրամիության հետ համագործակցության շրջանակում` ավելացնելով, որ կառավարության հաջողությունները նաեւ պայմանավորված են նման արդյունավետ գործակցությամբ: Ա. Գեւորգյանը նշեց, որ Գերմանիան Հայաստանի կառավարության կարեւոր գործընկերներից մեկն է` պայմանվորված իրականացվող ծրագրերի բազմակողմանիությամբ եւ դրանք ընդլայնելու առկա հնարավորություններով: Նա կարեւորեց մարզերում իրականացվող ջրամատակարարման եւ ջրահեռացման համակարգերի վերականգման վարկային ծրագրով կատարվող աշխատանքները, հույս հայտնելով, որ դրանք կդառնան կառավարության ծրագրում նախատեսված այս տարվա տնտեսական աճի խթանիչներից մեկը: Փոխվարչապետն ընդգծեց, որ ՀՀ կառավարության համար առաջնահերթություն է մնում մեծ տարողունակությամբ ջրամբարի կառուցման հարցը եւ կարեւորեց Կապսի ջրամբարի վերակառուցումը` քննարկելով KfW- ի ֆինանսավորմամբ այն իրականացնելու հնարավորութունը:

Զրուցակիցները քննարկեցին հայ-գերմանական համագործակցությանը վերաբերող այլ հարցեր: