10 տարուց ավելի տրանսպորտային միջոցների 120 ձեռնարկատերեր՝ նախարարությունում

ՀՀ տրանսպորտի եւ կապի նախարարությունում հունիսի 22-ին առաջին անգամ կայացել է 10 տարուց ավելի տարիք ունեցող ընդհանուր օգտագործման ուղեւորատար տաքսի-ավտոմոբիլային տրանսպորտով փոխադրումների կազմակերպման գործունեության լիցենզիայի եւ ներդիրի տրամադրման վերաբերյալ լիցենզավորման հանձնաժողովի նիստ:

Նիստում հայտ են ներկայացրել 120 անհատ ձեռնարկատերեր, որոնց զգալի մասի տրանսպորտային միջոցների տարիքը 10 տարուց ավելի է եղել: Բացառությամբ մի քանիսի, բոլոր հայտերը բավարարվել են:

Հիշեցնենք, որ ՀՀ կառավարության համապատասխան որոշմամբ, հունիսի 22-ից հանվել է մարդատար-տաքսի ավտոմոբիլներով ուղևորափոխադրումներում ներգրավվող տրանսպորտային միջոցների տարիքային սահմանափակումը: Նման որոշումը պայմանավորված է եղել բազմաթիվ քաղաքացիների կողմից 10 տարուց ավելի տարիք ունեցող մեքենաներով ուղևորափոխադրումներ իրականացնելու ցանկությամբ:
Տեղեկացնենք նաեւ, որ «Հայաստանի Հանրապետության կառավարության 2007թ. մարտի 22-ի N 655-Ն որոշման մեջ փոփոխություններ և լրացումներ կատարելու մասին» համապատասխան որոշմամբ, սահմանվել է լիցենզիա և ներդիր ստանալու համար անհրաժեշտ փաստաթղթերի նոր ցանկ, որտեղ առավելագույնս նվազեցվել է ներկայացվող պարտադիր փաստաթղթերի քանակը, հստակեցվել են լիցենզավորման պարտադիր պայմանները և պահանջները, սահմանվել են տրանսպորտային միջոցին ներկայացվող տեխնիկական պայմանները: