Տնտեսությունն իր օրինաչափությունից շեղվել է. Արմեն Պողոսյան

Օլիմպիական շինություններ էին պատրաստվում մեր հարևան Սոչիում և մերոնք չկարողացան մասնակցել դրան, ինչն էլ վնասեց շինանյութի արտահանմանը: Այս մասին Լուրեր.com-ի հետ զրույցում ասաց Սպառողների միության նախագահ Արմեն Պողոսյանը՝ անդրադառնալով վերջերս նկատված շինանյութի շուկայում ապրանքների գների բարձրացմանը:

Նա նշեց, որ կար մի պահ, երբ թվում էր, որ մեր մոտ երկկենտրոնացում կա շինանյութի արտադրության մեջ։ Պողոսյանը նշեց շինանյութի թանկացման մի քանի պատճառներ. «Նախ՝ ցեմենտ արտադրում է երկու գործարան, երկուսն էլ՝ հայտնի օլիգարխների է պատկանում, երկրորդ՝ շինանյութի ծավալի նվազումն է, երրորդ՝ արտահանման կրճատումն է։ Այս ամենում իր ազդեցությունն ունի նաև Ռուսաստանից վերցված վերջին վարկը՝ 500 միլիոն դոլար, որի մեծ մասը պետք է ծառայեր շինարարությանը խթանմանը, իսկ իրականում դրանք չօգտագործվեցին և այդ իսկ պատճառով մենք տեսնում ենք կիսակառույց շենքեր։ Տնտեսությունն իր օրինաչափությունից շեղվել է»,- ասաց Արմեն Պողոսյանը։

Հիշեցնենք, որ մամուլում հրապարակված լուրերի համաձայն վերջին մեկ ամսվա ընթացքում շինանյութի շուկայում ապրանքների գները 9 տոկոսով բաձրացել են: Շատ խանութներում դրանք արդեն իսկ թանկացել են, որոշ տեղերում էլ փորձում են պահպանել նախկին գինը, ինչպես վստահեցնում են՝ իրենց շահույթի հաշվին:

Նրանք, սակայն, թերթի թղթակցի հետ զրույցում խոստովանել են, որ երկար չեն կարողանա զսպել գնաճը:

Ի դեպ, նշված ժամանակահատվածում շինանյութը թանկացել է 8-15 տոկոսով:

Լիա Թահմազյան