Ծիրանն այս տարի առատ է

Ծիրանը քմահաճ միրգ է, սակայն հայերիս համար այն յուրահատուկ բրենդային նշանակություն ունի, ուստի գյուղատնտեսական տարվա կանխատեսումների մեջ ծիրանի սպասվող բերքի հանդեպ ընդգծված հետաքրքրությունը հաճախ ծայրահեղությունների է տանում մասնագետներին և հատկապես` ոչ մասնագետներին: Ընթացիկ տարվա գարնանը զանգվածային լրատվության միջոցներով առանձին վայ-մասնագետներ արդեն ահազանգ էին հնչեցնում, թե ծիրանի այգիներում զանգվածային սնկային հիվանդություն է սկսվել, և այս տարի նույնպես ծիրանը քիչ է լինելու: Կանխատեսումներին հաջորդող ասուլիսների ժամանակ մատուցվողը ճշմարտության տեղ ընդունող լրագրողներն անգամ հարցնում էին. «գոնե ուտելու ծիրան կլինի՞»:

Այլ էին ՀՀ գյուղատնտեսության նախարարության մասնագետների կանխատեսումները, և այսօր նրանք վստահաբար պնդում են, որ առատ բերքի իրենց սպասելիքները լիովին արդարացել են: Ասվածի վկայությունը շուրջ տասն օր առաջ սկսված ծիրանի բերքահավաքի առաջին ամփոփումներն են, որոնք զգալիորեն գերազանցում են 2011-ի ցուցանիշները:

Այսպես, նախորդ տարվա 2300 տոննայի փոխարեն այսօրվա դրությամբ արդեն արտահանվել է 3500 տոննա ծիրան: Տեղական վերամշակող կազմակերպությունները, որոնք բոլորն սկսել են ծիրանի մթերումը, արդեն ընդունել են 2000 տոննա ծիրան այն դեպքում, երբ 2011-ի մթերման ընդհանուր ցուցանիշը ընդամենը 2800 տոննա էր: Կատարված մոնիթորինգի արդյունքում նախորդ տարվա 48 հազար 200 տոննայի փոխարեն ընթացիկ տարվա արտադրության ծավալը զգալիորեն կավելանա: Նույնը և արտահանումների ու մթերումների բնագավառում:

Բերքն առատ է, ուստի նախորդ տարիներից զգալիորեն ցածր գները շուկայում գյուղացիները խելամիտ և հիմնավորված են համարում:

Ի դեպ, նույնպիսի առատ բերք է սպասվում նաև դեղձենու այգիներից, և այստեղ նույնպես վայ-մասնագետների վաղ գարնանային տագնապներն ու ահազանգերը կրկին կանգնում են իրենց շտապողականության և չհիմնավորվածության տխուր փաստի առջև:

Այսօր այս ամենի ականատեսը եղավ արտադրող-իրացնող-արտահանող շղթային մոտիկից և անմիջականորեն ծանոթանալու նպատակով Արարատի մարզի մի շարք տնտեսություններ, «Սպայկա» բեռնափոխադրող և «Նոյյան» վերամշակող ձեռնարկություններ այցելած ՀՀ գյուղատնտեսության նախարար Սերգո Կարապետյանը:

Ամենուր լավ բերքով պայմանավորված աշխատանքային բարձր տրամադրություն էր: Եվ այնուամենայնիվ՝ «շտապել է պետք» ուղեկցող լրագրողների հետ զրույցի ընթացքում նշեց նախարարը: «Ծիրանի բերքահավաքը կարճ է տևում: Ճիշտ է, թե արտահանումների, թե մթերումների համար բավարար նախապատրաստական աշխատանքներ կատարվել են, սակայն բերքահավաքը այդ ամենի պիկն է,և մենք ամենօրյա գործուն ուշադրությամբ պետք է աշխատենք օպերատիվորեն արձագանքել բոլոր ծագող խնդիրներին»,- նշեց Սերգո Կարապետյանը: