Հայաստանը շարունակում է խոցելի մնալ արտաքին ցնցումների հանդեպ

Միջազգային վարկանիշային Fitch Ratings գործակալությունը հաստատել է Հայաստանի էմիտենտի դեֆոլտի երկարաժամկետ վարկանիշը արտարժույթի ու ազգային արժույթի համար BB մակարդակով, կանխատեսումը վարկանիշով «կայուն է»:

Ինչպես ասվում է Fitch Ratings «Sovereign Review and Outlook» զեկույցում, Հայաստանը շարունակում է խոցելի մնալ արտաքին ցնցումների հանդեպ, հաշվի առնելով ընթացիկ գործողությունների հաշվի մեծ դեֆիցիտը՝ ՀՆԱ-ի 11 տոկոս: Միաժամանակ Fitch-ը կանխատեսում է համաշխարհային ՀՆԱ-ի աճի դանդաղում՝ 2011թ. 2.7 տոկոսից մինչ 2012թ. 2.2 տոկոս: Սակայն, արդեն 2013-14թթ. տնտեսության աճը կկազմի 2.8 տոկոս 2013թ. և 3.1 տոկոս 2014թ.:

Զեկույցում ասվում է, որ նավթի գների անկումը լուրջ ռիսկեր է պարունակում Հայաստանի համար։ Այն կարող է ազդել Ռուսաստանից Հայաստան կատարվող մասնավոր տրանսֆերտների վրա։

Գործակալության նախօրեին հրապարակված Sovereign Review and Outlook զեկույցում նշվում է, որ եվրոգոտու պարտքային ճգնաժամը բացասաբար է անդրադառնում առաջին հերթին Եվրոպայի զարգացող շուկաներով երկրների վրա։

Ըստ զեկույցի՝ ԱՊՀ պետությունների դեպքում նավթի գների անկումը ռիսկեր է ստեղծում ոչ միայն հումք արտահանող, այլև այն երկրների համար, որոնք արտահանման և դրամական փոխանցումների առումով կախված են Ռուսաստանից։ Զեկույցում հիշատակվում են, մասնավորապես, Հայաստանը և Մերձբալթյան երկրները։

Նշենք, որ Ռուսաստանը Հայաստանի առևտրատնտեսական երկրորդ խոշոր գործընկերն է, որին բաժին է ընկնում Հայաստանի արտաքին առևտրի 23.3%-ը և արտահանման 17%-ը։ Բացի այդ՝ Ռուսաստանին է բաժին ընկնում դեպի Հայաստան մասնավոր դրամական փոխանցումների մոտ 85%-ը։

Հայաստանի Կենտրոնական բանկի ուսումնասիրություններով՝ Ռուսաստանից կատարվող մասնավոր տրանսֆերտների և նավթի գների միջև առկա է ուղղակի կապ։

Նշենք, որ հունիսին համաշխարհային շուկայում Brent տեսակի 1 բարել նավթի գինը նվազել է մոտ 10%-ով։

Եթե մինչև մարտի կեսը նավթի գինը բարձրանում էր, մարտի 15-ին հասնելով առավելագույն $125/1բարել մակարդակի, ապա մինչև հունիսի 21-ն ընկած ժամանակահատվածում առավելագույն այս մակարդակից այն նվազել է $36-ով։ Այսօր 1 բարել նավթը Նյու Յորքի հումքային բորսայում գնանշվում էր $93.12-ին մոտ միջակայքում։