Ինչպես է ազդելու նավթի գնի բարձրացումը հայաստանյան շուկայի վրա

Միջազգային շուկայում նավթի գնի բարձրացումն իր ազդեցությունը կունենա նաև հայաստանյան շուկայի վրա: Այս մասին Lurer.com-ի հետ զրույցում ասաց Սպառողների ասոցիացիայի նախագահ Արմեն Պողոսյանը: Վերջինիս խոքսերով՝ առանց միջազգային թանկացման էլ մեզ մոտ թանկացումներ լինում են օրեցօր: «Հիմա այդ գերկենտրոնացված շուկայում ևս մեկ արդարացումն այն է, որպեսզի սկսվի թանկացման հաջորդ փուլը: Ես և ոչ մի տնտեսագետ այդ ուղղակի կապը չի տեսնում, որովհետև մեզ մոտ անդրադառնում է միայն թանկացումը: Մենք երբեք չենք տեսել էժանացում: Եվ հիմնական ցավ այն է, որ մեզ մոտ, հատկապես բենզինի հարցում, գերկենտրոնացումն այն աստճանի է հասել, որ ձեռնարկությունից մեկը շուկայում տիրապետում է 42,7 տոկոսը, իսկ մյուսը՝ 41,5 տոկոսը, և երկուսով թելադրում են գները», - նշեց Պողոսյանը՝ հավելելով, որ չկա մրցակցություն, որը կնպաստեր գների մատչելիությանը:

Արմեն Պողոսյանի խոսքերով՝ այդ ձեռնարկություններից մեկը վերջերս տուգանվեց հարյուր մլն դրամով. «Ես գտնում եմ, որ նման գումարը մեծ ձեռնարկությանը տուգանելը հավասար է պարգևատրության: Որովհետև իրենց համար դա սարսափելի գումար չէ, այդ գումարն իրենք վճարում են, իրենց առնվազն մեկ տարի չեն անհանգստացնի և իրենք կշարունակեն անել իրենց գործողությունները, այսինքն՝ թելադրել գները մեզ», - ասաց Արմեն Պողոսյանը: Վերջինիս կարծիքով՝ նավթի գների թանկացումը հայաստանյան շուկայի վրա կազդի շուրջ տասը տոկոսով: