Արգելափակող LIBOR-ը մեծ իրարանցում է ստեղծել ֆինանսական շուկայում

LIBOR (London Interbank Offered Rate) ցուցանիշը մեծ իրարանցում է ստեղծել ֆինանսական շուկայում: Այն բրիտանական բանկային ասոցիացիայի կողմից մշակված տոկոսադրույքն է, որով սահմանվում է բանկերի՝ միմյանց տրվող վարկերի տոկոսադրույքները:

Ըստ New economics Foundation-ի ղեկավար Թոնի Գրինհեմի, եռամսյա LIBOR գործակիցը կարճաժամկետ տոկոսադրույքի միջազգային ցուցանիշն է. «Հենց այդ ցուցանիշն է որոշում բանկերին վճարվող տոկոսների չափը միլիոնավոր հաճախորդներին հիփոթեքային, բիզնես և ուսումնական վարկեր տրամադրելու դիմաց: Դրանից է կախված նաև վարկի ապահովագրման պայմանները: LIBOR-ի ազդեցությունը տարածվում է ոչ միայն Մեծ Բրիտանիայում, այլ նաև ամբողջ աշխարհում տեղի ունեցող ֆինանսական գործառույթների վրա»: Ըստ մասնագետների, LIBOR-ը ամենօրյա, մինչև 350 տրլն. դոլարին հասնող, ֆինանսական գործարքների ցուցանիշն է:

Այսպիսով, LIBOR ցուցանիշի մանիպուլյացիան հարվածել է ոչ միայն շարքային հարկատուների, այլ նաև ամբողջ աշխարհում գործող տարբեր կազմակերպությունների գրպաններին: Այդ սկանդալի հետևանքով նորից վերանում է համաշխարհային բանկային համակարգի նկատմամբ մարդկանց վստահությունը: