Արմեն Գեւորգյանն ընդունեց Ասիական զարգացման բանկի հայաստանյան գրասենյակի տնօրենին

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Ասիական զարգացման բանկի (ԱԶԲ) հայաստանյան գրասենյակի տնօրեն Դեյվիդ Դոուլին:

Զրուցակիցները քննարկեցին բանկի աջակցությամբ իրականացվող ծրագրերի ընթացքին եւ հետագա համագործակցությանն առնչվող հարցեր: Փոխվարչապետը գոհունակություն հայտնեց գործակցության մակարդակից՝ կարեւորելով ԱԶԲ-ի աջակցությամբ մարզերում իրականացվող ենթակառուցվածքների՝ հատկապես ճանապարհների, ջրամատակարարման ցանցի բարելավման ծրագրերը: Նա նշեց, որ մարզերում եւ համայնքներում ենթակառուցվածքների զարգացման ուղղությունը շարունակում է առաջնային լինել նոր կառավարության համար, եւ հույս հայտնեց, որ այդ ոլորտում արդյունավետ գործակցությունը կշարունակվի:

Փոխվարչապետն անդրադարձավ նաեւ ԱԶԲ աջակցությամբ իրականացվող քաղաքային կայուն զարգացման ծրագրին՝ նշելով, որ կառավարության առանձնահատուկ ուշադրության կենտրոնում են Գյումրի, Վանաձոր, Ջերմուկ եւ Դիլիջան քաղաքների զարգացման ծրագրերը, որոնք ընդգրկված են նաեւ ԱԶԲ-ի ծրագրում: Պայմանավորվածություն ձեռք բերվեց Դիլիջան քաղաքի զարգացման ծրագրի վերաբերյալ առաջիկայում համատեղ քննարկում կազմակերպել՝ քաղաքում ներդրումային նախագծեր իրականացնող եւ շահագրգիռ բոլոր կառույցների ներկայացուցիչների մասնակցությամբ:

Քննարկվեցին քաղաքային համայնքների համար կարեւոր նշանակություն ունեցող մեկ այլ՝ աղբահանության ծրագրին առնչվող հարցեր: Կարեւորվեց գործարար միջավայրի համար առավել գրավիչ պայմանների առաջարկումը՝ հաշվի առնելով, որ նման նախագծերի իրականացումն առավել արդյունավետ կարող է լինել մասնավոր հատվածի հետ գործընկերությամբ:
Բացի նշված ուղղություններից, հեռանկարային համարվեց դպրոցաշինության, գյուղատնտեսության, վերականգնվող էներգետիկայի ոլորտներում համագործակցությունը:

Կողմերն անդրադարձան նաեւ «Հյուսիս-հարավ» ճանապարհային միջանցքի ներդրումային ծրագրին՝ հույս հայտնելով, որ առաջիկայում կմեկնարկի ծրագրի իրականացման հիմնական փուլը: