Մանվել Գրիգորյանի մոտ հայտնաբերվել է մոտ 16 հիվանդություն. նա ազա՞տ կարձակվի

Թավշյա հեղափոխությունից հետո կոռուպցիայի դեմ պայքարում իրար հաջորդեցին աղմակահարույց գործերի բացահայտումները: Դրանցից մեկի արդյունքում էլ կալանավորվեց ԱԺ պատգամավոր, գեներալ Մանվել Գրիգորյանը:

Գրիգորյանի առողջական խնդիրների կապակցությամբ Հատուկ քննչական ծառայությունում նշանակված դատաբժշկական փորձաքննության արդյուքներով պարզվել է, որ վերջինս ունի առողջական մի շարք խնդիրներ: 

«Մանվել Գրիգորյանի մոտ հայտնաբերվել է մոտ 16 հիվանդություն: Դատաբժշկական փորձաքննություն եզրակացության արդյունքներն ուղարկվել են պաշտպանական կողմին և Մանվել Գրիհգորյանին»,-ԼՈւՐԵՐ.com-ի թղթակցի հետ զրույցում ասաց Մանվել Գրիգորյանի փաստաբան Արսեն Մկրտչյանը: 

Փաստաբանի պնդմամբ՝ իր պաշտպանյալի կալանքն անհամատեղելի է առողջական խնդիրների հետ. «Ըստ օրենքի՝ նա կարող էր ընդհանրապես չկալանավորվել»,-նշեց Մկրտչյանը: 

Մամուլում տեղեկություններ կան, չի բացառվում, որ քննիչների ուսումասիրություններից հետո Մանվել Գրիգորյանի խափանման միջոց կալանքը փոխվի, քանի որ նրա առողջական վիճակը գնալով վատթարանում է: Փաստաբանը, սակայն, ասաց, որ ինքն այդ մասին տեղյակ չէ:

Գլխավոր դատախազությունից էլ տեղեկացրին, որ Մանվել Գրիգորյանի խափանման միջոցը փոխելու միջնորդություն է ներկայացվել: «Պաշտպանը միջնորդություն է ներկայացրել խափանման միջոց կալանավորումը փոխելու վերաբերյալ, և կիրառելու անձնական երաշխավորություն: Միջնորդությունը սակայն մերժվել է», - մեզ հետ զրույցում ասաց Դատախազության մամուլի խոսնակ Արևիկ Խաչատրյանը: 

Նշենք, որ կառավարության 825-Ն որոշմամբ, կան հիվանդություններ, որոնք  թույլ են տալիս մարդուն կալանքից ազատել, իսկ Գրիգորյանի հիվանդությունները կան տվյալ ցանկում: 

Հիշեցնենք, որ հունիսի 16-ին ՀՀ ԱԱԾ-ն ձերբակալեց ԱԺ պատգամավոր, գեներալ-լեյտենանտ Մանվել Գրիգորյանին, ապօրինի զենք-զինամթերք և զինվորների համար նախատեսված պարենամթերք պահելու մեղադրանքով։ Այնուհետև՝ հունիսի19-ին գումարված ԱԺ արտահերթ նիստում քննարկման դրվեց պատգամավոր Մանվել Գրիգորյանին անձեռնմխելիությունից զրկելու հարցն ու ընդունվեց այն: 

Սոնա Հարությունյան