Ալիկ Սարգսյանը՝ «Կարամելի Հարութի» ինքնասպանության զենքի հետ իր կապի մասին

Ըստ շրջանառվող տեղեկությունների, նախկին պատգամավոր Հարություն Ղարագյոզյանի՝ «Կարամելի Հարութի» ինքնասպանությունը կատարվել է նախկին ոստիկանապետ, ԱԺ ՀՀԿ խմբակցության պատգամավոր Ալիկ Սարգսյանի նվիրած մարտական ատրճանակով։

ԼՈւՐԵՐ․com-ի հետ զրույցում  Սարգսյանը ոչ հաստատեց, ոչ էլ հերքեց, որ ատրճանակ է նվիրել Հարություն Ղարագյոզյանին։

«Ես հիմա չեմ հիշում՝ իրեն ատրճանակ նվիրել եմ, թե՝ չէ, բայց ես հասկացա, որ Անդրանիկ Մարգարյանի նվիրած ատրճանակով է ինքնասպան եղել»,-ասաց Սարգսյանը։

Հարցին՝ ի՞նչ հարաբերություններ է ունեցել նա Հարություն Ղարագյոզյանի հետ և արդյո՞ք վերջինիս և Կարո Կարապետյանի՝ «Յուվեցի Կարոյի» միջև եղած խնիրներից տեղյակ է՝ Սարգսյանը պատասխանեց․ «Շատ լավ, շատ մարդկային, ընկերական հարաբերություններ ենք ունեցել, բայց թե ինչ խնդիրներ են եղել նրանց միջև՝ տեղյակ չեմ»։

Հիշեցնենք, որ հոկտեմբերի 6-ին, ժամը 22-ն անց 40-ի սահմաններում ոստիկանության Կենտրոնականի բաժին ահազանգ է ստացվել, որ Նորք Մարաշի Արմենակյան փողոցում գտնվող հացատներից մեկում կրակոցներ են։ Րոպեներ անց ոստիկանության Կենտրոնական բաժին ահազանգեր են հնչել Երևանի տարբեր բժշկական կենտրոններից։ Հայտնում էին, որ իրենց մոտ բուժօգնության են տեղափոխվել հրազենային վիրավորումով երկու տղամարդ։ Հոսպիտալացված տղամարդկանցից մեկը` Կարո Կարապետյանը մահացել է։ 

Նրա սպանությունը կատարելու մեջ կասկածվում է ԱԺ նախկին պատգամավոր Հարություն Ղարագյոզյանը՝ «Կարամելի Հարութը»։ Վերջինս հոկտեմբերի 7-ին Կոտայքի մարզի Զովունի գյուղի քարի արտադրամասի վարչական շենքի 2-րդ հարկում «Պ.ԲԵՐԵՏՏԱ» տիպի, 6.35 մմ տ/չ տիպի մարտական ատրճանակով, ըստ նախնական տվյալների, ինքնասպանություն է գործել։