Դարբասի համայնքապետը դիմել է ամենավերին ատյաններին որպեսզի հասկանա, թե ջրի խնդիրն ինչպես են լուծելու

Սյունիքի մարզի Դարբաս համայնքի բնակիչները տևական ժամանակ է՝ բողոքում են խմելու ջրի բացակայության պատճառով: Նրանց խոսքով՝ համայնքում մեկնարկել են ասֆալտապատման աշխատանքները, սակայն «դա չպետք է տեղի ունենա», քանի որ ասֆալտապատման դեպքում չեն կարողանա լուծել ջրատար խողովակների հարցը և դա այդպես էլ կմնա անլուծելի:

Դարբասի համայնքապետ Սաշա Ստեփանյանը ԼՈՒՐԵՐ.com-ի հետ զրույցում նշեց, որ համայնքի ասֆալտապատման աշխատանքները դադարեցվել են: «Անձամբ եմ հանձնարարել՝ դադարեցնել ասֆալտապատման աշխատանքները, խմելու ջրի խնդրի համար էլ դիմել եմ վարչապետ Փաշինյանին, տարածքային կառավարման նախարար Սուրեն Պապիկյանին և մեր մարզպետին, նրանք այսօր պետք է քննարկեն մեր ջրի հարցը, որպեսզի հասկանանք, թե խնդիրն ինչպես ենք լուծելու»,-մեզ հետ զրույցում ասաց Ստեփանյանը:

Մեր այն դիտարկմանը, թե դադարեցման դեպքում ինչպես են համայնքի բնակիչներն, այնուամենայնիվ, բողոքում, համայնքապետը մանրամասնեց. «Դե, հնարավոր է՝ չգիտեն, ես ի՞նչ իմանամ, 1961 թվականից այս հին խողովակներով է ջուրը մատակարարվում, իսկ հիմա փորձում եմ ինչ-որ կերպ լուծել դա»:

Այն հարցին, թե ինչու հենց հիմա որոշեց  անդրադառնալ խնդրին, համայնքապետը սրտնեղեց, թե հիմա է կարողանում անել պարզապես, իսկ թե նախկինում ինչու չի կարգավորվել այդ խնդիրը, համայնքապետը դժվարացավ պատասխանել:

Այն ճշտող հարցին, թե ինչու այդ դեպքում չի իրազեկել համայնքի նակիչներին խնդրի կարգավորման և ասֆալտապատման աշխատանքների դադարեցման մասին, Դարբասի համայնքապետը հակադարձեց. «Ինչպե՞ս թե չգիտեն, բոլորն էլ գիտեն, կամ էլ ուզում են իրազեկված չլինեն, չեմ իմանում»:

Արմինե Միքայելյան