Հայտնի են Եվրասիական թվային պլատֆորմի մրցույթի Հայաստանի կիսաեզրափակչի հաղթողները

 Ամփոփվել են Հայաստանում անցկացվող Եվրասիական թվային պլատֆորմի մրցույթի Հայաստանի կիսաեզրափակչի արդյունքները: Հաղթող է ճանաչվել «Earlyoneа»-ն, որը հերթերի կառավարման համակարգ է և թույլ է տալիս ընկերություններին խնայել ռեսուրսները և այցելուների ժամանակը, «Kamurj»-ը, որը ԵԱՏՄ-ում արտադրողների և հումքի մատակարարների միջև համագործակցության հարթակ է, «Արմաթ լաբորատորիա»-ն, որը ստեղծում է ինովացիոն լաբորատորիաներ դպրոցականների շրջանում հմտությունների զարգացման համար և «Shadowmatic» գլուխկոտրուկ խաղը:

Կիսաեզրափակիչը  տեղի  է ունեցել Երևանում հոկտեմբերի 6-ին «Դիջիթեք» ցուցահանդեսի շրջանակում: ԵԱՏՄ-ի Կոլեգիայի ներքին շուկաների, տեղեկատվության եւ հաղորդակցության տեխնոլոգիաների գծով խորհրդի անդամ (նախարար)Կարինե Մինասյանը տեղեկացրել է, որ ավելի վաղ անցկացվել է 4 կիսաեզրափակիչ:

«Երևանում կայացածը վերջինն էր: Մենք հիմա ունենք 20 մասնակից, որոնք հայտնվել են եզրափակչում: Մենք կարող ենք ասել, որ այս մրցույթը հաջողությամբ է իրականացվել»,-ասել է Կարինե Մինասյանը:

Կիսաեզրափակչի հաղթողները կարող են մասնակցել  եզրափակչին, որն անցկացվելու է հոկտեմբերի 22-24-ը Երևանում կայանալիք«Եվրասիական շաբաթ» ֆորումի  շրջանակում: