Նախկին նախարարների 150 оրերը. ո՞ր ծրագրերը մնացին կիսատ

Վերլուծական 9 Հոկտեմբեր, 2018 14:04

Արդեն անդրադարձել ենք պաշտոնաթող մարզպետներին և նրանց կատարած աշխատանքին, այժմ վերլուծենք ԲՀԿ և ՀՅԴ քվոտայով նախարարական պորտֆելները ստացած և օրերս դրանց հրաժեշտ տված նախարարների՝ այս կարճ ժամանակահատվածում կատարած աշխատանքը:

Մասնավորապես, Տրանսպորտի և կապի նախկին նախարար Աշոտ Հակոբյանն այս հինգ ամիսների ընթացքում բավական ակտիվ աշխատանք է կատարել. նախարարության անմիջական կուրացիայի ներքո «Հյուսիս-հարավ» ճանապարհային միջանցքի 2-րդ տրանշում մայիսի 15-ից մինչեւ օգոստոսի 15-ն ընկած ժամանակահատվածում կառուցվել է 6.5 կմ երկարությամբ բետոնե պատվածք, արժեքը 3.2 մլրդ դրամ է, ինչը կազմում է 2018 թվականի պլանով նախատեսված աշխատանքերի 29 տոկոսը: Բացի այդ, չմոռանանք, որ մեծամասամբ հենց Տրանսպորտի և կապի նախարարության ջանքերի արդյունքն էր, որ Վրաստանի կառավարության կողմից ընդունված հացահատիկային բեռների ներկրման արգելքը հետաձգվել է մեկ տարով: Բացի այդ, Հակոբյանի թիմը տրանսպորտի բնագավառում 3 օրենսդրական նախաձեռնությունների փաթեթներ է կազմել եւ ուղարկել շահագրգիռ պետական մարմինների քննարկմանը, մնում է՝ դրանց ընթացք տրվի:

Գյուղատնտեսության արդեն նախկին նախարար, ՀՅԴ-ական Արթուր Խաչատրյանը հողօգտագործողներին ոռոգման կաթիլային ցանցով ապահովելու վերաբերյալ բավական հաստափոր ծրագիր էր մշակել: Հուսանք, որ նրա հաջորդը ամենայն լրջությամբ կվերաբերվի նախորդի մշակած ծրագրերին: Խաչատրյանի նախարարության ամիսները նաեւ ուղեկցվեցին գյուղմթերքի թանկացումներով, չնայած, չմոռանանք` էժանացավ բանանը` 900-ից դառնալով 500-550 դրամ:

ԲՀԿ քվոտայով Արտակարգ իրավիճակների նախարարի պաշտոնը զբաղեցրած Հրաչյա Ռոստոմյանն իր պաշտոնավարման ամիսներին հասցրել է բավական մեծ ծավալի աշխատանք կատարել՝ թարմացվել է փրկարար ծառայության համազգեստների բազան, վերանորոգման աշխատանքներ են սկսվել հանրապետության բոլոր փրկարար ջոկատներում: Ստուգումներ են իրականացվել ե՛ւ Երեւանի, ե՛ւ մարզային գազալցակայաններում, հայտնաբերվել են խախտումներ, ժամանակ տրվել թերությունները շտկելու համար: Պետք է նշել, որ մինչ այս պաշտոնը զբաղեցնելը Ռոստոմյանը զբաղեցնում էր սպորտի նախարարի պաշտոնը և այդ պաշտոնում էականորեն բարձրացել էր համաշխարհային սպորտում Հայաստանի դիրքն ու դերը:

ՀՅԴ քվոտայով Տնտեսական զարգացման և ներդրումների նախարարի պաշտոնը զբաղեցրած Արծվիկ Մինասյանը թերևս «ամենաանհաջողակն» է. նա 2016 թվականին նշանակվեց տեղեկատվական տեխնոլոգիաների եւ զարգացման նախարար, ապա` բնապահպանության, հետո` դարձյալ տնտեսական զարգացման եւ ներդրումների նախարար, այժմ նորից՝ գործազուրկ: Մինասյանի պաշտոնավարման ընթացքում, ըստ պաշտոնական վիճակագրության, տնտեսական աճը կազմել է 8.3 տոկոս, միևնույն ժամանակ, պետք է նշել, որ ներդրումային բում այդպես էլ չստացվեց՝ չնայած Մինասյանը բազմիցս էր հայտարարում որ բիզնեսը շահագրգռված է Հայաստանում ներդրումներ կատարելու հարցում, այնուամենայնիվ, գործնականում դա չարտահայտվեց: Մինասյանի հաջողված ծրագրերից կարելի է առանձնացնել Հայաստանում շաքարի երկրորդ ձեռնարկություն ունենալու ուղղությամբ կատարված աշխատանքները:

ՀՀ էներգետիկ ենթակառուցվածքների եւ բնական պաշարների արդեն նախկին նախարար Արթուր Գրիգորյանն այս կարճ պաշտոնավարման ընթացքում դրսևորեց բարձր պրոֆեսիոնալիզմ: Նախարարության ամենակարեւոր ձեռքբերումների շարքում է ոչ միայն հանքավայրերի աշխատանքների նկատմամբ օրենքով սահմանված խիստ վերահսկողություն սահմանելը, այլ նաև այն, որ էլեկտրաէներգիայի սակագինը սոցիալապես անապահով ընտանիքների համար հուլիսի 1-ից բանակցությունների հետեւանքով նվազել է, որի համար վճարել են 10 դրամով ավելի քիչ, իսկ գազի համար` 20 դրամով պակաս՝ էականորեն թեթևացնելով քաղաքացիների սոցիալական բեռը:

Սպորտի և երիտասարդության հարցերի նախարարության կայքի անգամ հպանցիկ ուսումնասիրությունը ցույց է տալիս, որ նախկին նախարար Լեւոն Ֆահրադյանը այս կարճ ժամանակահատվածում զբաղված է եղել միայն քաղաքացիների և հրամաններ ընդունելով: Ստացվում է՝ վերջինս աշխատաժամանակի մեծ մասը անցկացրել է աշխատասենյակում, մինչդեռ նախարարի, այն էլ՝ սպորտի նախարարի նման նստակյացությունը բնավ չէր կարող նպաստել Հայաստանում վերոնշյալ ոլորտի զարգացմանը:

Ինչպես և մարզպետներինը՝ նախարարների աշխատանքը ևս մնացել է կիսատ, դժվար է ասել՝ նրանց մշակած ծրագրերը ռազմավարությունները, ոլորտների զարգացման հայեցակարգերը կաշխատե՞ն երկարատև հեռանկարում, թե՝ ոչ, սակայն մի բան ակնհայտ է՝ այս կարճ ժամանակահատվածում էլ կատարվել է բավական մեծ ծավալի աշխատանք, և այս նախարարների մեծ մասը իրենց հաջորդներին փոխանցելու են քիչ թե շատ «ոտքի կանգնեցրած» ոլորտներ:

Ստելլա Խաչատրյան