Գեղարքունիքի մարզպետ Գնել Սանոսյանն անցկացրեց առաջին աշխատանքային խորհրդակցությունը

Գեղարքունիքի մարզպետ Գնել Սանոսյանն առաջին աշխատանքային խորհրդակցությունն անցկացրեց Գեղարքունիքի մարզպետարանի աշխատակազմի հետ:

«Արմենպրես»-ի տեղեկացմամբ՝ խորհրդակցության սկզբում նորանշանակ մարզպետը ծանոթացավ մարզպետարանի ղեկավար անձնակազմի եւ ստորաբաժանումների ղեկավարների հետ, ապա խոսեց աշխատանքային հարաբերությունների եւ առաջիկա անելիքների մասին:

«Ես միշտ փորձում եմ նվիրվել ինձ վստահված աշխատանքներին, ուստիեւ հեշտությամբ չթողեցի ՀՀ բնապահպանության նախարարությունը, որտեղ ձեռնարկել էի բնապահպանական մի շարք կարեւոր ծրագրեր, որոնց իրականացման համար, սակայն, ավելի տեւական ժամանակ էր պահանջվում: Այստեղ էլ մեզ սպասվում է լարված ու դժվարին, բայց պատասխանատու աշխատանք, որը պետք է կատարենք համատեղ ուժերով: Կարծում եմ, որ յուրաքանչյուրի դերը շատ կարեւոր է այդ աշխատանքում, եւ եթե մեկը թերանալու է իր աշխատանքում, ապա դա անպայմանորեն կազդի ընդհանուրիս աշխատանքների վրա: Ես պատրաստ եմ բոլորին աջակցել ու խրախուսել իրենց աշխատանքներում, սակայն միաժամանակ պահանջելու եմ կարգապահ, արդյունավետ ու նվիրված աշխատանք: Մեր երկրում հիմա իրավիճակ է փոխվել, եւ ես կարծում եմ, որ մեր որդեգրած ներկա քաղաքական կուրսը մեզ, մեր սերունդներին առաջնորդելու է դեպի ավելի շեն , հզոր ու բարեկեցիկ Հայաստան: Ուստի առաջարկում եմ լցվել նոր աշխատանքային եռանդով ու ջանասիրությամբ, աշխատել նոր ավյունով ու ուժով, անկեղծ նվիրումով»,-աշխատակազմին դիմեց մարզպետ Գնել Սանոսյանը:

Այնուհետ մարզպետը կանգ առավ մարզպետարանի առաջիկա գլխավոր անելիքների, զարգացման գերակա ուղղությունների վրա: «Լավ ճանաչում եմ մեր մարզը՝ իր բոլոր հիմնախնդիրներով հանդերձ: Բավականին բարդ մարզ է Գեղարքունիքը, որտեղ առկա են սոցիալ-տնտեսական եւ բնապահպանական լուրջ խնդիրներ: Մի տարածքում հողը մշակող չկա, մի այլ տարածքում էլ՝ հողը չի բավարարում մշակներին: Շատ բնակավայրերում խմելու եւ ոռոգման ջրի մատակարարման խնդիրներ կան, որոնք չեն լուծվում տասնամյակներ շարունակ: Իսկ Սեւանա լճի հետ կապված հիմնախնդիրները շատ ավելի դինամիկ լուծումներ են պահանջում: Մենք մեր մարզի անունը պիտի դնենք էկոմարզ ու կյանքի կոչենք կարեւորագույն ներդրումային ծրագրեր: Ասել է թե՝ մեր գյուղատնտեսական արտադրանքը պետք է լինի էկոլոգիապես մաքուր՝ զերծ քիմիական պարարտանյութերից: Մեր հիմնական նպատակներից մեկն էլ պետք է լինի «Սեւան» ազգային պարկը կենսոլորտային համալիր դարձնելը: Համոզված եմ, որ բնապահպանական խնդիրների լուծման ուղղությամբ մենք մեծ ներդրումներ կբերենք մարզ»,- հավաստիացրեց մարզպետ Գնել Սանոսյանը:

Խոսրով Խլղաթյան