Արմեն Պողոսյանը կասկած չունի, որ գազի գինը կբարձրանա

Այս տարվա հոկտեմբերից գազի գնի թանկացումը Սպառողների միության նախագահ Արմեն Պողոսյանը հավանական չի համարում, քանի որ այժմ նախընտրական շրջան է: Այս մասին Lurer.com-ի հետ զրույցում ասաց ինքը՝ Պողոսյանը:

Նրա խոսքերով, այդ բոլոր խոսակցությունները կամ գնային վերափոխումները որպես կանոն կատարվում են ընտրություններից հետո: Արմեն Պողոսյանը համոզմունք հայտնեց, որ 2011 թվականի ապրիլին գոյություն ունեցող թվերն առայժմ կշարունակեն գործել: «Այն, որ գինը բարձրանալու է, ես դրանում կասկած չունեմ: Ռուսաստանը մեզ գազը տալիս է առանձնահատուկ գնով. 180 դոլար գնով գազ մեր մոլորակի վրա գոյություն չունի, նվազագունը 300-ի սահմաններում է և ավելի: Մենք այդ առումով արտոնյալ վիճակում ենք», - նշեց Պողոսյանը՝ հավելելով, որ երբեք ոչ մի տնտեսվարող չի կարող իրեն երկար զսպել զերծ մնալ հնարավոր շահույթից: «Այդ քննարկումները միշտ էլ լինում են և միշտ էլ դրանց լուծումները լինում են ընտրություններից հետո:

Մեզ համար ամենակարևորն այն է, որ մենք դիմագրավենք գներին, այսինքն՝ դիմանա մեր տնտեսությունը և մեր սպառողը: Գնի բարձրացումն անխուսափելի է, մենք պետք է մտածենք, թե ինչո՞վ ենք կոմպենսացնելու կամ դիմագրավելու դրան», - ասաց Արմեն Պողոսյանը:

Հիշեցնենք, որ ըստ մամուլի հրապարակումների, այս տարվա հոկտեմբերի 1-ից բարձրացվելու է Հայաստանին մատակարարվող ռուսական գազի գինը:

Ըստ այդմ, 1000 խմ գազը ՀՀ սահմանին կարժենա 280 ԱՄՆ դոլար: Իսկ արդեն հաջորդ տարվա հունվարի 1-ից գազի գինը կդառնա արդեն 320 դոլար: