Մարությանի քայլերը հակասում են Փաշինյանի խոստումներին

Վերլուծական 15 Հոկտեմբեր, 2018 19:00

Երևանի նորընտիր քաղաքապետ Հայկ Մարությանը չի բացառում հասարակական տրանսպորտի ուղեվարձի թանկացումը: Այդ մասին նա հայտարարել է երդմնակալության արարողությունից հետո՝ լրագրողների հետ զրույցում:

Նա նշել է, որ 2013թ.-ին դեմ է եղել ուղեվարձի թանկացմանը, սակայն այսօր իր դիրքորոշումը մի քիչ փոխվել է: Քաղաքապետը զարմանալի է համարում, որ 5 տարվա ընթացքում ամեն ինչ թանկացել է, բացի ուղեվարձից: Մարությանը չբացառեց, որ նախորդ իշխանությունները վախեցել են հասարակական դժգոհությունից, և սակագինը չեն վերանայել: Մինչդեռ քաղաքացիների համար ամենզարմանալին պետք է լինի այն, որ Մարությանն այս հարցը պատրաստվում է լուծել հանրաքվեի միջոցով, ինչը, մեղմ ասած՝ աբսուրդ է: Միակ հնարավոր տարբերակը թերևս այն է, որ քաղաքապետը հույսը դնում է իշխող քաղաքական ուժի բարձր վարկանիշի վրա, որի օգնությամբ կարելի է «պլստացնել» անգամ նման, ոչ պոպուլյար որոշումները: Օրինակ՝ պատճառաբանելով, որ այդպիսով կվերանան ՀՀԿ-ական գծատերերը: Ընդ որում. տրանսպորտի ուղեվարձի թանկացման ամենաակտիվ քննադատը մշտապես եղել է ներկայիս վարչապետ Նիկոլ Փաշինյանը, մինչդեռ Հայկ Մարությանի նման հայտարարությունից հետո թե՛ ինքը, թե՛ Փաշինյանը հայտնվում են բավական երկիմաստ վիճակում…

Մարությանի մյուս հայտարարությունը վերաբերում էր չարաբաստիկ կարմիր գծերին: «Կարմիր գծերի եւ այդ փարկինգների գումարները գնում են քաղաքային բյուջե, եւ ինչ-որ խնդիրներ են լուծվում դրանով»,-հայտարարել է Մարությանը: Պարզվում է՝ այդ գումարները գնում են մանկապարտեզների վերանորոգմանը, և դրանց վերացումից հետո սույն հաստատությունները վերանորոգմանը կարոտ են մնալու: Հասկանալի է, որ մանկապարտեզների օրինակը հենց այնպես չի բերվում. երեխաների կարիքների ապահովման շահարկումը գուցե փոքր ինչ մեղմի հասարակության արձագանքը, որը միանշանակ լինելու է բացասական: Ի դեպ, փաստորեն, այստեղ էլ Մարությանն ու Փաշինյանը խնդրի վերաբերյալ հակառակ կարծիքն են արտահայտում: Հիշեցնենք, դեռեւս 2014 թվականի մարտի 24-ին, այն ժամանակ ՀԱԿ խմբակցության պատգամավոր Նիկոլ Փաշինյանը Աժ ամբիոնից բուռն ելույթ ունեցավ՝ միանշանակ պահանջ հնչեցնելով՝ արագաչափերը պետք է հանվեն, «կարմիր գծերը» պետք է ջնջվեն: Վարչապետ դառնալուց հետո Փաշինյանի կարծիքն այս հարցի շուրջ չենք լսել, չենք լսել նաև, որ այդ կարծիքը 2014 թվականից հետո փոփոխության է ենթարկվել: Ստացվում է՝ քաղաքապետ Մարությանը, ընտրվելով Փաշինյանի անձնական վարկանիշի հաշվին, վարչապետի արտահայտած դիրքորոշումներին տրամաբանորեն հակառակ քայլեր է ցանկանում կատարել…