Չենք կարող 20 տարվա փչացրածը 20 օրում շտկել. Վանեցյան

 Հայաստանի ֆուտբոլի ֆեդերացիայի նախագահ Արթուր Վանեցյանը ներկա գտնվեց հավաքականի մարզմանը, որից հետո պատասխանեց լրագրողների հարցերին:

 Վանեցյանը փաստեց, որ բաց մարզան ընթացում ֆուտբոլիստների հետ քննարկել է Ջիբրալթարի հետ խաղը և հետագա անելիքները: «Թեպետ պարտվեցինք Ջիբրալթարին, սակայն վիճակագրությանը նայելով սա վերջին շրջանի լավագույն խաղերից մեկն էր: Ամեն դեպքում պարտություն ունենք: Առաջիկայում կներկայացնենք երկարաժամկետ ծրագիր, որով կզարգացնենք մանկապատանեկան ֆուտբոլը»,-ասաց Վանեցյանը:

ՀՖՖ նախագահի հույս հայտնեց, որ Մակեդոնիայի դեմ խաղում թիմը կկարողանա դրական  արդյունքի հասնել: «Ամենակարևորն այն է լինելու, որ ֆուտբոլով հնարավորինս շատ զբաղվեն: Ես չեմ ուզում թերագնահատել այսօրվա հավաքականի ֆուտբոլիստներին, բայց եթե օբյեկտիվ լինենք, նայելով խաղը կասենք, որ չի բավարարում մեզ»,-փաստեց նա:

Վանեցյանը շեշտեց, որ ծրագիրը երկարաժամկետ է և դրա առաջին պտուղները կքաղենք 4-5 տարի անց միայն: «Ես դիմում եմ երկրպագուներին՝ խնդրելով համբերատարությամբ լցվել և վստահեն մեզ: Առաջիկայում կտեսնենք գործուն քայլեր: Չենք կարող 20 տարվա փչացրածը 20 օրում շտկել»,-եզրափակեց ՀՖՖ նախագահը:

Հայաստանի ֆուտբոլի ազգային թիմն Ազգերի լիգայի 4-րդ տուրում կմրցի Մակեդոնիայի հավաքականի հետ. խաղը կկայանա հոկտեմբերի 16-ին Երևանի Վազգեն Սարգսյանի անվան Հանրապետական մարզադաշտում: Հայաստանի ֆուտբոլի ազգային թիմը Ազգերի լիգայի D դիվիզիոնի 4-րդ ենթախմբում նախավերջին տեղում է:3-րդ տուրից հետո ենթախմբի մրցաշարային աղյուսակը գլխավորում է Մակեդոնիայի ընտրանին, որը երեք խաղում ունի երեք հաղթանակ (9 միավոր): Երկրորդ տեղում 3 միավորով Լիխտենշտեյնն է, նույնքան միավորով նախավերջին տեղում Հայաստանն է, իսկ Ջիբրալթարն իր պատմական հաղթանակից հետո, որը տոնեց Երևանում Հայաստանի ընտրանու նկատմամբ, ի դեպ իր պատմության մեջ առաջին պաշտոնական խաղում տոնած հաղթանակը, կրկին ունի 3 միավոր: