Վտանգավոր է. դատավորները բարձրացնում են գրավի շեմը

«Աղմկահարույց գործերի գրավների բարձր շեմը դատավորներին սովորեցրեց հասարակական հնչեղություն չունեցող մյուս գործերի գրավները ևս բարձրացնել, որը վտանգավոր հետևանքների կարող է հանգեցնել»։ Այս մասին ԼՈւՐԵՐ․com-ի թղթակցի հետ զրույցում ասաց փաստաբան Լուսինե Սահակյանը։

Իսկ թե ինչ հետևանքների մասին է խոսքը՝ փաստաբանը նշեց․

«Գրավի շեմը բարձրացնելով մյուս գործերի համար, որոնք այնքան էլ աղմկահարույց չեն՝ ոչ բոլոր դեպքերում են անձինք հնարավորություն ունենում այդ գրավը վճարել։ Եվ եթե անգամ վճարում են՝ լուրջ խնդիրների են բախվում, օրինակ, հարազատները ստիպված են լինում պարտք վերցնել, կամ ընկերներն են վճարում»։

Սահակյանը նաև նկատեց, որ գրավի գումարը պետք է լինի ողջամիտ, հակառակ դեպքում՝ խախտվում է Մարդու իրավունքների և հիմնարար ազատությունների պաշտպանության մասին կոնվենցիայի 5-րդ հոդվածը։

Հարցին՝ ինչո՞ւ է դատարանը կոնվենցիայի նման հոդվածի առկայության դեպքում շատ հաճախ ոչ ողջամիտ շեմ սահմանում՝ Սահակյանն ասաց․ «Իմ մոտ տպավորություն է, որ դատարանը հասարակության զայրույթը մեղմելու համար է նման բարձր շեմ սահմանում, որովհետև ցածր գումարի սահմանումը կարող է հասարակության զայրույթն  առաջացնել։ Սակայն հասարակությունով չպետք է պայմանավորված լինի դատական համակարգի և դատարանների ակտերը»։

Փաստաբանը նաև նշեց, որ անձի հանդեպ կիրառվող գրավի չափը որոշվում է նրա վճարունակությունը հաշվի առնելով։

«Միլիոնավոր դոլարների կարողություն ունեցողի համար եթե սահմանվի 1 մլն դրամ գրավ՝ բնականաբար՝ այդ գումարի կորուստը ոչինչ չի կարող նշանակել տվյալ մարդու համար, հետևաբար, գրավի չափը պետք է լինի այնպիսին, որ այդ անձը վախենա իր գումարը կորցնելուց, սակայն դա չի կարող լինել աստղաբաշխական թվերի հասնող»։

Հիշեցնենք, որ թավշյա հեղափոխությունից հետո տեղի ունեցող բացահայտումների արդյունքում՝ մեկը մյուսի հետևից կալանավորվել և խոշոր չափի գրավի դիմաց ազատ են արձակվել մի շարք օլիգարխներ, քրեական աշխարհի հետ կապ ունեցող անձինք, ինչպես նաև «Մարտի 1»-ի գործով պաշտոնյաներ, Դոն Պիպոն, Յուրի Խաչատուրովը, Սերժ Սարգսյանի եղբորորդին, Արտյոմ Կանևսկոյը և այլք։ Սակայն նրանց մեջ ամենախոշոր գրավով՝  1 մլրդ դրամ գրավով ազատ է արձակվել Վաչագան Ղազարյանը, որն առավել հայտնի է Սերժի Վաչո անունով։