Ո՞րն էր Ռոբերտ Քոչարյանի գլխավոր մեսիջը

Երկրորդ նախագահ Ռոբերտ Քոչարյանը ռուսական «ՌԻԱ Նովոստի» գործակալությանը տված հարցազրույցում հայտնել է, որ մտադիր է Հայաստանում ստեղծել  կուսակցություն, հավաքել նոր քաղաքական թիմ, նոր մարդիկ և լցնել այդ առումով ընդդիմադիր դաշտում ձևավորված վակուումը: Հասկանալի է, որ ֆորմալ առումով՝ Քոչարյանը ընդդիմության է լինելու Նիկոլ Փաշինյանին, իսկ ինչ վերաբերում է մյուս քաղաքական ուժերին, ապա վերջիններս Քոչարյանի հայտարարությունից հետո մանևրելու լայն դաշտ են ձեռք բերում: Բանն այն է, որ Քոչրարյանի կուսակցական հայտը ոչ թե քաղաքական դաշտում ակտիվության ազդանշան է, այլ մեսիջ ներքաղաքական դաշտի խաղացողներին: Քոչարյանն իրեն սահմանազատում է այն ուժերից, որոնք տեսականորեն կարող էին դառնալ Երկրորդ նախագահի քաղաքական վերադարձի տրամպլինը:

Միևնույն ժամանակ, այդ ուժերը մաքրվում են Քոչարյանի անվան հետ կապվելուց, ինչը նախընտրական շրջանում նրանց օդի և ջրի պես անհրաժեշտ է: Քոչարյանի՝ նման լավությունն իհարկե ունի նաև իր պատճառները՝ Երկրորդ նախագահին միանշանակ ձեռնտու է, որպեսզի Նիկոլ Փաշինյանի քաղաքական թիմից բացի՝ բոլոր մյուս քաղաքական ուժերը որքան հնարավոր է՝ շատ ձայն հավաքեն արտահերթ խորհրդարանական ընտրություններում: Թեև Քոչարյանը ձևավորում է սեփական քաղաքական թիմը, դա դեռևս չի նշանակում, որ հետագայում համագործակցությունը նույն ՀՀԿ-ի, կամ ՀՅԴ-ի հետ՝ բացառվում է: Այս պահին Քոչարյանը թայմ աութ է վերցնում, և այդ դադարը ձեռնտու է բոլոր կողմերին: Երկրորդ նախագահը քաջ գիտակցում է, որ այս պահին իր քաղաքական վարկանիշը թույլ չի տալիս մտնել ակտիվ քաղաքական գործընթացների մեջ, սակայն հետագայում, խորհրդարանական ընտրություններից հետո ունեցած ռեսուրսների շնորհիվ ձևավորելով սեփական թիմը և հենվելով որոշակի քանակությամբ ձայն հավաքած քաղաքական ուժերի աջակցության վրա՝ Քոչարյանը կարող է հաջողել:

Հարցազրույցի ժամանակ հնչեցրած ևս մեկ կարևոր մեսիջ՝ ուղղված էր Սերժ Սարգսյանին: Քոչարյանը, մասնավորապես, հայտարարել է, որ իր նորաստեղծ քաղաքական թիմում կարող են տեղ գտնել նաև նախորդ իշխանության ներկայացուցիչները, այսպես ասած՝ «հները»: Խոսքը, իհարկե, առաջին հերթին ՀՀԿ-ականների և ՀՀԿ-ից հեռացածների մասին է, և Քոչարյանը բացահայտ ակնարկում է, որ վերջիններս կարող են մոտ ապագայում հանգրվանել իր թիմում: Մյուս կողմից՝ Քոչարյանը շեշտում է, որ նոր քաղաքական թիմի կորիզը լինելու է երիտասարդությունը: Այսինքն՝ լավ հասկանալով, որ անմիջական քաղաքական դերակատարմամբ իր դրությունը բարդացնելուց բացի, որևէ այլ արդյունքի հասնել չի կարող, Ռոբերտ Քոչարյանն այժմ սկսել է գուցե մտածել այն մասին, որ պետք է քաղաքականության մեջ «լինել» ոչ անմիջականորեն, այսինքն՝ ֆինանսավորել քաղաքականությունը այլ ֆորմատով, նոր երիտասարդական ձևաչափի միջոցով:

Մեծ ցանկության դեպքում Ռոբերտ Քոչարյանը խորհրդարանական ընտրություններին կարող էր մասնակցել մարդ-կուսակցություններից կազմված դաշինքի միջոցով, սակայն նա, ըստ էության, մերժում է այդ տարբերակը՝ հասկացնելով, որ երկարաժամկետ քաղաքական պրոյեկտ է ցանկանում ստեղծել և ամբողջությամբ խաղի մեջ մտնել արդեն դեկտեմբերին սպասվող արտահերթ խորհրդարանական ընտրություններից հետո:

Ս.Խաչատրյան