Իսկական ժամանակն է խոսել գազի և էլեկտրաէներգիայի սակագների իջեցման մասին․ Միքայել Մելքումյան

«Չի կարելի 15 տարի խոսել այն մասին, թե առայժմ ժամանակը չէ գազի կամ էլեկտրաէներգիայի սակագների իջեցման մասին խոսեը։ Ես կարծում եմ՝ հակառակը, հենց հիմա իսկական ժամանակն է խոսել, որ գազի և էլեկտրաէներգիայի գները պետք է իջեցվեն, խոսքը վերջնական սպառողի մասին է»,-այս մասին այսօր Գազի և էլեկտրաէներգիայի հարցերով ԱԺ քննիչ հանձնաժողովի նիստի ժամանակ ասաց ԱԺ փոխնախագահ, «Ծառուկյան» խմբակցության պատգամավոր Միքայել Մելքումյանը։ 

Մելքումյանը նշեց, որ պետք է վերանայվի ամբողջ գնումների համակարգը,  գազի կալորիականության խնդիրը, որը շատ ակտուալ հարց է: Պետք է քննարկվեն գազի սպասարկման հարցերը՝ արդյոք դրանք մնացին մոնոպո՞լ, թե՞ մրցակցային հարաբերություններ կան։

Անդրադառնալով ՀԷՑ-ի ոլորտին, նա ասաց , որ Էլեկտրաէներգիայի գները փոխկապակցված են գազի գների հետ, իհարկե՝ մասամբ։

Մելքումյանը նաև խոսեց կորուստների և շահութաբերության հարցի մասին․ «Ո՞վ է որոշում, որ Գազպրոմի շահութաբերությունը պետք է լինի 10, ՀԷՑ-ինը՝ 14 տոկոս, վերջին հաշվով դա Հանրային ծառայությունների հանձնաժողովն է հաստատում»։