«Հավերժ փոխքաղաքապետն» ազատվել է պաշտոնից. ինչ ճակատագիր է սպասվում նրան

Կամո Արեյանն այլևս Երևանի քաղաքապետի առաջին տեղակալը չէ: Նա երկուշաբթի օրվանից ազատվել է պաշտոնից: Տեղեկությունը ԼՈւՐԵՐ.com-ի թղթակցի հետ զրույցում հաստատեցին Երևանի քաղաքապետարանի լրատվության բաժնից:

Արդյոք Արեյանն այլ պաշտոն զբաղեցնելու է քաղաքապետարանում, թե ոչ՝ հարցին ի պատասխան քաղաքապետարանի լրատվության բաժնից ասացին, որ պաշտոնական տեղեկատվություն լինելու դեպքում կհրապարակեն:

Այսօր մամուլում լուրեր էին շրջանառվում, թե Արեյանին քաղաքապետի տեղակալի պաշտոնում փոխարինելու է «Քաղաքացիական պայմանագիր» կուսակցության անդամ, Երևանի «Իմ քայլը» դաշինքի ավագանու անդամ Վահագն Հովակիմյանը: Սակայն, վերջինս մեզ հետ զրույցում հերքեց՝ նշելով, որ մանդատից հրաժարվել է հոկտեմբերի 17-ին, քանի որ ավագանիում իրեն չի տեսնում և ճանապարհը բացել է նրանց համար, ովքեր այնտեղ անելիք ունեն։

Հովակիմյանը նաև նշել էր՝ որպես քաղաքական թիմի անդամ՝ այժմ պատրաստվում է ԱԺ արտահերթ խորհրդարանական ընտրություններին։

Նկատենք, որ «հավերժ փոխքաղաքապետ» Կամո Արեյանը, ինչպես կատակում են մարդիկ, տեղակալի պաշտոնը զբաղեցնում էր վաղնջական ժամանակներից և հաշվի առնելով այս հանգամանքն ու ներկայիս քաղաքապետի և նրա կադրերի անփորձությունը կարելի է ենթադրել, որ Արեյանը չի հեռանա քաղաապետարանից՝ կնշանակվի այլ պաշտոնի: Օրերս էլ վարչապետի պաշտոնակատար Նիկոլ Փաշինյանն էր հայտարարել «բարիկադները ապամոնտաժելու» գործընթացի մեկնարկի մասին, ինչը ենթադրում է, որ նախկին փորձառուները նոր իշխանությունում աշխատելու շանս կստանան: Հավանաբար, սա վերաբերվում է նաև Կամո Արեյանին:  

Նշենք, որ Կամո Արեյանը Երևանի քաղաքապետի առաջին տեղակալի պաշտոնը զբաղեցնում էր 2003 թվականից:

Սոնա Հարությունյան