Լիտվայում ՀՀ դեսպանությունը պարգևատրել է հայ-լիտվական հարաբերությունների զարգացման գործում մեծ ավանդ ներդրած գործիչներին

 Լիտվայում ՀՀ դեսպանությունը լիտվացի ականավոր գեղանկարիչ, կոմպոզիտոր Միկալոյուս Կոնստանտինաս Չյուրլյոնիսի տուն- թանգարանում «Մ․ Կ․ Չյուրլյոնիս» հիմնադրամի հետ համատեղ հոկտեմբերի 17-ին կազմակերպել է «Մ․ Կ․ Չյուրլյոնիս, լուսավոր անձինք-2018» ամենամյա մրցանակաբաշխությունը, որն այս տարի նվիրված էր հայ-լիտվական հարաբերություններին։ Այս մասին  տեղեկացրինԼիտվայում ՀՀ դեսպանությունից՝ հավելելով. «Միջոցառմանը բացման խոսքով հանդես եկավ Լիտվայում ՀՀ դեսպան Տիգրան Մկրտչյանը, ով, շնորհակալություն հայտնելով հիմնադրամին միջոցառումը հյուրընկալելու համար, ներկայացրեց լիտվացի մրցանակակիրներին, ովքեր իրենց ավանդն են ներդրել հայ-լիտվական հարաբերությունների զարգացման գործում։

Հետմահու պարգևատրվեց մեծ հայագետ, թարգմանիչ, Հայաստանի Գիտությունների ազգային ակադեմիայի պատվավոր դոկտոր Մարիտե Կոնտրեմայտեն, ով թարգմանություններ է կատարել գրաբարից, միջին և ժամանակակից հայերենից՝ Նարեկացուց մինչև 20-րդ դար՝ Պարույր Սևակ և Հրանտ Մաթևոսյան: Դեսպան Մկրտչյանի խոսքով՝ Մարիտե Կոնտրեմայտեն հայ-լիտվական բարեկամության ամենավառ խորհրդանիշներից մեկն է, ով իր ողջ գիտակից կյանքը նվիրել է ամենատարբեր ոլորտներում երկկողմ կապերի ամրապնդմանը։

Մրցանակ շնորհվեց Վարենայի քաղաքապետ Ալգիս Կաշետային, ով անգնահատելի ավանդ է ունեցել 2005թ․ Լիտվայի Սեյմասի կողմից Հայոց ցեղասպանության ճանաչման և առհասարակ  երկու երկրների կապերի սերտացման գործում։

Մրցանակակիրների շարքում էր նաև ՀՀ-ում Լիտվայի նախկին դեսպան Էրիկաս Պետրիկասը, ում Տիգրան Մկրտչյանը շնորհակալություն հայտնեց Հայաստանի և Լիտվայի միջև քաղաքական, տնտեսական և մշակութային հարաբերությունների զարգացման գործում կատարած մեծ աշխատանքների համար։

Միջոցառման հյուրերը նաև հնարավորություն ունեցան ծանոթանալու հայազգի նկարիչներ Վարդգես Սուրենյանցի, Գևորգ Բաշինջաղյանի և Փանոս Թերլեմեզյանի կտավների կրկնօրինակներին, հնչեցին դաշնամուրային կատարումներ Մ․ Կ․ Չյուրլյոնիսի և Կոմիտասի ստեղծագործություններից։

Տեղեկանք․ «Մ․Կ․ Չյուրլյոնիս, լուսավոր անձիք» մրցանակաբաշխությունը ամենամյա ավանդական միջոցառում է, որը «Մ․Կ․ Չյուրլյոնիս» հիմնադրամի և Լիտվայում հավատարմագրված դեսպանություններից մեկի հետ համատեղ կազմակերպվում է յուրաքանչյուր տարի և նվիրվում երկու երկրների միջև հարաբերություններին և այդ հարաբերությունների խորացման ու զարգացման մեջ մեծ ավանդ ունեցած մարդկանց»։