Գյումրիում հայտնաբերված նորածինների մայրը նոտարական վավերացմամբ հրաժարվել է փոքրիկների խնամքից

Գյումրու Ֆրիտյոֆ Նանսենի անվան գիշերօթիկ հաստատության բակում հայտնաբերված նորածին տղաների մայրը երեկ երեկոյան նոտարական վավերացմամբ հրաժարվել է փոքրիկների խնամքից։ Քանի, որ մայրը գրավոր հրաժարվել է երեխաներից, երեխաները կհաշվառվեն որպես առանց ծնողական խնամքի մնացած երեխաներ, այնուհետև՝ որպես որդեգրման ենթակա երեխաներ։
Այս մասին  հայտնեց Շիրակի մարզպետարանի աշխատակազմի ընտանիքի, կանանց և երեխաների իրավունքների պաշտպանության բաժնի պետ Լիլիթ Գորգինյանը։ «Մայրը ո՛չ մասնագիտություն ունի, ո՛չ աշխատանք, բավական երկար աշխատանք տարանք, համոզեցինք չհրաժարվել, բայց նա հրաժարվեց փոքրիկներից` նշելով սոցիալական ծանր պայմանները։ Երիտասարդ կինը Գյումրի էր եկել մոր հետ, որը նույնպես մենակ է մեծացրել աղջկան»,- ասաց Գորգինյանը։ Հավանաբար այդ դժվարությունները տեսնելով` նրանք նախընտրել են երեխաներին ավելի ապահով ձեռքեր հանձնել։ Պարզվել է նաև, որ փոքրիկները ծնվել են հոկտեմբերի 1-ին, նրանցից մեկի անունը Վահե է, մյուսինը` Վահան։
Հոկտեմբերի 17-ին, Գյումրու Շիրակացի թիվ 10 հասցեում գտնվող Ֆ.Նանսենի անվան գիշերօթիկ հաստատությունից ոստիկանության Մուշի բաժինն ահազանգ էր ստացել, որ հաստատության բակում հայտնաբերել են երկու բարուրված նորածին տղա երեխաներեր: Մայրը հայտնաբերել է հոկտեմբերի 19-ին։ Ոստիկանությունը հայտնել էր, որ նա Արարատի մարզի բնակիչ է, 18 տարեկան։