Մատչելի բնակարաններն անմատչելի են դարձել

«Մատչելի բնակարան՝ երիտասարդ մասնագետներին» ծրագրի շահառուները բողոքում են ծրագրի պայմանների փոփոխությունից: Բանն այն է, որ բնակարանները պետք է կառուցվեին հենց այս ծրագրի շրջանակներում, այնինչ՝ հոկտեմբերի 20-ին տարածված հայտարարությամբ, ծրագրի շահառուներին հիփոթեքային վարկեր հնարավոր է տրամադրել միայն «Երիտասարդ ընտանիքին` մատչելի բնակարան» պետական ծրագրի շրջանակում:

Բանն այն է, որ շահառուներին մտահոգում են որոշակի չպարզաբանված հարցեր, մասնավորապես՝ փոփոխություններից հետո ովքե՞ր կարող են օգտվել ծրագրից կամ ի՞նչ է լինելու ծրագրում ներգրավված այն շահառուների հետ, ովքեր չեն համապատասխանում չափորոշիչներին։ 

Նշենք, որ «Վերածնունդ» թաղամասում բնակարան ձեռք բերելու համար դեռևս 1․5 տարի առաջվանից հերթագրվել են տարբեր բնագավառների1050 մասնագետներ: «Մատչելի բնակարան՝ երիտասարդ մասնագետներին» ծրագրով շահառուները պետք է պարտադիր մասնագետ լինեն, ունենան մշտական աշխատանք, ընտանեկան կարգավիճակը կարևոր չէ, իսկ փոփոխված ծրագրով շահառուների որոշ մասը դուրս կմնա դրանից, քանի որ փոխարենն առաջարկվում են բոլորովին այլ, ինչպես շահառուներն են նշում՝ ոչ այնքան բարենպաստ պայմաններ։

Թե ինչու է հենց հիմա փոփոխությունների ենթարկվում ծրագիրը և որքանով է կապված քաղաքական փոփոխությունների հետ, հայտնի չէ։ Սակայն խոսակցություններ կան, որ սա արվում է միտումնավոր, քանի որ ի սկզբանե բնակարանաշինական ծրագիրը եղել է Երրորդ նախագահ Սերժ Սարգսյանի գաղափարը, ուստի, չի բացառվում, որ նրա հեռանալուց հետո այն այլևս կյանքի չի կոչվի։

Նկատենք, որ վերջերս վարչապետի պաշտոնակատար Նիկոլ Փաշինյանը հայտարարել էր, որ աննախադեպ ծրագիր է լինելու, որով երիտասարդ ընտանիքները կկարողանան շահավետ պայմաններով բնակարաններ ձեռք բերել։ Ստացվում է՝ նոր կառավարությունը, փորձելով լուծել այս խնդիրը՝ երիտասարդ մասնագետների ծրագիրը դարձնում է երիտասարդ ընտանիքների ծրագիր: 

Պարզաբանումներ ստանալու համար ԼՈւՐԵՐ․com-ի թղթակիցը փորձեց զրուցել ծրագիրն իրականացնող՝ ԵՊՀ շրջանավարտների միավորում ՀԿ նախագահ, սպորտի և երիտասարդության հարցերի նախկին փոխնախարար Արսեն Քարամյանի հետ, սակայն վերջինս չցանկացավ որևէ մեկնաբանություն տալ, միայն նշեց՝ հաղորդագրության մեջ ամեն բան ասված է։

Մեզ հետ զրույցում «Վերածնունդ» երիտասարդական ավանի շահառու, լրագրող Արմինե Գևորգյանը նշեց, որ հայտարարությունն անակնկալ է եղել 1.5 տարի ծրագրի մեկնարկին սպասող շահառուների համար․ ««Երիտասարդ ընտանիքին` մատչելի բնակարան» պետական ծրագրով սահմանված չափորոշիչներն այլ են․ շահառուները պետք է լինեն ամուսնացած և զույգի տարիքն իրար գումարած՝ չպետք է գերազանցի 70-ը, եթե միայնակ են՝ 35-ը։ Փաստացի, ես չեմ կարող մասնակցել ծրագրին, քանի որ իմ տարիքը 39 է և ամուսնացած չեմ։ Այս ծրագրով բոլորովին այլ պայմաններ են, մարման ժամկետը 10 տարի է և այլն։ Բայց, անկեղծ ասած, դեռ տեղյակ չեմ՝ ինչ պայմաններ են առաջարկում մեզ»,- իր մտահոգությունը հայտնեց Արմինե  Գևորգյանը՝ նշելով, որ չգիտի՝ փոփոխված պայմաններով ինքը ծրագրի շահառու է, թե՝ ոչ:

Ի դեպ, այսօր լրագրողների հետ զրույցում էլ, Նիկոլ Փաշինյանն, անդրադառնալով խնդրին, նշել է․ «Վրդովվելու անհրաժեշտություն չկա. եթե անարդար է, կնայենք, կշտկենք, կուղղենք»։

Նշենք, որ երիտասարդ շահառուները պարզաբանումներ ստանալու համար պատրաստվում են դիմել Կառավարություն, իսկ ստեղծված իրավիճակի համար մեղադրում են ԵՊՀ շրջանավարտների միավորում ՀԿ-ին, քանի որ այստեղից շարունակ վստահեցրել են՝ ծրագիրն իրականացվելու է:

Սոնա Հարությունյան