ՀՀԿ-ն փոշմանե՞լ է. պլան Բ-ն՝ գործի մեջ
Վերլուծական
Հանրապետական կուսակցությունը հայտարարել է կառավարության ներկայացրած Ընտրական օրենսգրքի նախագծին դեմ քվեարկելու որոշման մասին: Դեկտեմբերին սպասվող ընտրությունները, եթե դրանք կայանան, ամենայն հավանականությամբ, կանցկացվեն հին Ընտրական օրենսգրքով: Արդո՞ք նման սցենարը առավելագույնն է, ինչին փորձում է ստեղծված իրավիճակում հասնել ՀՀԿ-ն, թե՞ խնդիրը շատ ավելի բարդ է: Իհարկե, Հանրապետական կուսակցությանը միանշանակ ձեռնտու է մասնակցել արտահերթ խորհրդարանական ընտրություններին մի օրենսգրքով, որը գրվել էր հենց այս կուսակցության համար տոկոսներ խփելու առավել հարմար պայմաններ ստեղծելու համար: Մյուս կողմից, Հանրապետականի նման պահվածքը կարող է փայլուն մշակված հակահեղափոխության առաջին արարը լինել միայն: Բանն այն է, որ ՀՅԴ հայտարարել է, թե դեմ է դեկտեմբերին արտահերթ խորհրդարանական ընտրություններ անցկացնելու Փաշինյանի որոշմանը:
Միևնույն ժամանակ, Դաշնակցությունը որևէ համաձայնություն չի տվել, որ վարչապետի ընտրության ժամանակ չի առաջադրի իր թեկնածուին: Մի պահ պատկերացնենք, որ ՀՅԴ այնուամենայնիվ առաջադրում է իր թեկնածուին և այդ թեկնածուին աջակցում է ՀՀԿ-ն, ընդ որում՝ ՀՀԿ ասելով՝ պետք է նկատի ունենալ նաև ֆրակցիայից դուրս եկած պատգամավորներին, որոնք կարող են շատ արագ կտրուկ փոխել իրենց դիրքորոշումները և միանալ մայր գետին: Ի դեպ, այդ նույն պատգամավորներն այսօր արդեն աջակցեցին ՀՀԿ-ին՝ չմասնակցելով ԱԺ նիստին և դրանով իսկ հեշտացնելով հանրապետականների սաբոտաժը:
Իսկ եթե ենթադրենք, որ ՀՀԿ խնդիրը հենց ընտրական օրենսգիրքն է, ապա ակնհայտ է դառնում այս քաղաքական ուժի ներսում որոշակի հակասությունների առկայությունը: Եթե նոր Ընտրական օրենսգիրքը չընդունվեր, ապա ՀՀԿ-ն կարող էր արտահերթ խորհրդարանական ընտրություններին չմասնակցելը պայմանավորեր իր սկզբունքային դիրքորոշմամբ: Այսպիսով, հանրապետականները նաև իրենց դեմքը կպահեին: Սակայն տպավորություն է ստեղծվում, որ ՀՀԿ-ում կա ևս մեկ թև, որը ցանկանում է մասնակցել արտահերթ ընտրություններին՝ այս մասնակցությունը դիտարկելով իբրև իրենց քաղաքական կարիերայի շարունակության միակ գրավական: Թե ՀՀԿ որ թևը ի վերջո կհաղթանակի՝ դժվար է ասել, իսկ մինչ այդ, ՀՀԿ-ն ևս մեկ անգամ անչափ վտանգավոր խաղ է սկսել, որում հաղթողներ և պարտվողներ կարող են և չլինել…
Ս.Խաչատրյան
ՈՒՂԻՂ ԵԹԵՐ
Ամենադիտված 
Ջուր չի լինի հուլիսի 28-ին ժամը 07.00-ից մինչև հուլիսի 29-ը ժամը 07.00-ն
