Արթուր Մեսչյանի համար Երևանի գլխավոր ճարտարապետ լինելը փորձություն է․ Տիգրան Բարսեղյան

Երևան քաղաքի նախկին գլխավոր ճարտարապետ Տիգրան Բարսեղյանն արդեն շնորհավորել է նորանշանակ գլխավոր ճարտարապետ Արթուր Մեսչյանին։ Այս մասին ԼՈՒՐԵՐ․com-ի թղթակցի հետ զրույցում ասաց ինքը՝ Տիգրան Բարսեղյանը։

Խոսելով իր և Մեսչյանի հարաբերությունների մասին՝ Բարսեղյանը նշեց․ «Մենք լավատեսորեն ենք նայում այս փոփոխություններին և, մասնավորապես, մեր ոլորտում լավ ակնկալիքներ ունենք, որովհետև քաղաքաշինությունը թիմային աշխատանք է։ Ես՝ որպես անհատ ճարտարապետ, դեռ անելիքներ ունեմ այդ ոլորտում»։

Արթուր Մեսչյանի գլխավոր ճարտարապետ լինելու վերաբերյալ Բարսեղյանն ասաց․ «Նա մեկ անգամ արդեն փորձել է լինել գլխավոր ճարտարապետ, իհարկե՝ այլ ժամանակներում էր դա։ Նա նաև նախագծային մեծ փորձ ունի, ունիկալ շենքեր ունի քաղաքում, ազնիվ կերպար է։ Ամեն ինչ կա՝ լավն ակնկալելու համար»։

Բարսեղյանը, սակայն, նկատեց, որ Արթուր Մեսչյանի համար Երևանի գլխավոր ճարտարապետ լինելը նաև փորձություն է, քանի որ այսօրվա քաղաքաշինական ոլորտում կան լուրջ խնդիրներ։ 

Նախկին գլխավոր ճարտարապետը կարծում է, որ տեսանելի արդյունքները կլինեն ավելի շատ, քան մինչ այժմ էր․ «Ժամանակներն էլ են դրան նպաստում»։

Բարսեղյանի կարծիքով, քաղաքում բազմաթիվ խնդիրներ կան, որոնցից պետք է սկսի նոր գլխավոր ճարտարապետը։

«Ե՛վ տրանսպորտ, և՛ բնակարանաշինություն, և՛ կանաչ տարածքների բալանսային ներդաշանակություն․․․ Ցանկացած մեծ քաղաքում խնդիրները մեծ են։ Եվ արդեն համոզվել ենք, որ չկան մեծ ու փոքր գործեր, կան լուրջ և անլուրջ մոտեցումներ, որովհետև մի փոքրիկ ճարտարարապետական ձևը կարող է այնքան տգեղ իրականացվել, որ մարդիկ շատ ավելի վատ տպավորություն ստանան քաղաքից։ Ամեն ինչին պետք է խորը մոտեցում և վերաբերմունք՝ նույնիսկ քաղաքի աղբմանները պետք է գեղեցիկ լինեն»։

Հարցին՝ Մեսչյանը կկարողանա՞ համաշխարհային նորարարական ճարտարապետական մոտեցումներով համալրել Երևան քաղաքը՝ Բարսեղյանը նկատեց․ «Դա նրա խնդիրը չէ, նա որպես գլխավոր ճարտարապետ՝ պետք է նպաստավոր հնարավորություները ձևավորի։ Դա անհատի լուծելու հարց չէ։ Այդ դաշտում նա կարող է որպես անհատ ձևավորվել, ունենալ իր դիմագիծը՝ ինչպես նախկին ճարտարապետները այս կամ այն չափով կարողացել են այդ ներկապնակը հարստացնել՝ իրենց կոլեգաների հետ։ Համաշխարհային փորձը ճարտարապետության առումով պետք է ինտեգրել և հնարավորինս ազգայնացնել»։ 

Ինչ վերաբերում է ճարտարապետական ներկայիս կառույցների նախագծերին և հնարավոր կրկնությանը նոր գլխավոր ճարտարապետի օրոք՝ Բարսեղյանը նկատեց, որ ճարտարապետական ժառանգություն կա, որն, ինքնըստինքյան՝ հայ ճարտարապետները կրկնում են։

«Կան գլոբալիզացիայի մարտահրավերներ, որոնք վատ կամ լավ առումով իրենց ներթափանցումն են ունենում ճարտարապետության ոլորտ և դառնում են մեծ քաղաքների «խաչը»»,- ավելացրեց նա։

Արմինե Արմենակյան