Հայաստանը կարող է 90-98 տոկոսով կիբեռանվտանգ երկիր դառնալ. Ջուլիանի

Երևանում մեկնարկել  է Եվրասիական գործընկերության միջազգային երրորդ համաժողովը:

Համաժողովին ելույթով հանդես եկավ նաև  ԱՄՆ նախագահի կիբեռանվտանգության գծով խորհրդական, Նյու Յորքի նախկին քաղաքապետ Ռուդոլֆ Ջուլիանին:

ԵՏՀ նախագահ Տիգրան Սարգսյանը նրանից հետաքրքրվեց՝ արդյո՞ք ԱՄՆ-ի մոտ տեխնոլոգիական առումով մեր տարածաշրջանի նկատմամբ հետաքրքրություն կա:

«Մեծ պատիվ է ինձ համար այսօր այստեղ գտնվել և խոսել այն թեմայի՝ կիբեռանվտանգության,  մասին, որն ինձ հետաքրքրել է: Չեմ կարծում, որ որևիցե մեկը կասկածում է, որ մենք բոլորս ենք խոցելի կիբեռհանցագործությունների առումով: Դա տեղի է ունենում ամբողջ աշխարհում և ԱՄՆ-ում այն տեղի է ունենում լուրջ հանցագործությունների տեսքով, որի ծավալներն ավելի մեծ են, քան սովորական գողոնը կամ առևանգումը: Սա  մեր հասարակությունում տեղի է ունենում արդեն երկար տարիներ և սա թիվ առաջին հանցանքն է, որը տեղի է ունենում ԱՄՆ-ում և տարեցտարի ծավալներով ընդլայնվում է: Եվրոպայի, Ասիայի զարգացող երկրներում կիբեռհանցանքները  շատ մեծ են և դրա համար պատճառ կա»,-նշեց նա՝ հավելելով, որ այդ ամենը գնալով խորանալու և վատանալու է:

 Նրա խոսքով՝ շատ կարևոր է, որպեսզի հասկական, թե ինչպես կարելի է ապահովել  երկրի անվտանգությունը կիբեռհարձակումներից:

«Սակայն նախևառաջ պետք է հասկանալ, որ 100 տոկոսանոց արդյունք չկա: Չկա մի կախարդական փայտիկ, որով կկարողանաս կիբեռտարածքում հաղորդակցությունը 100-տոկոսանոց անվտանգ դարձնել: Ցանկացած մարդ, ով մտածում է, որ կարող է դա անել, ապա ստում է: Տեխնոլոգիաների ընակլումը դեռևս չի հասել այնպիսի մակարդակի, որ 100 տոկոսով կանխվեն կիբեռհարձակումները: Ես կասկածում եմ, որ գիտության այնպիսի աստիճանի զարգացում կլինի, որը կհասնի 100- տոկոսոնոց անվտանգ մակարդակի: Որքան էլ տեղեկատվությունը  սահմանափակ, անվտանգ լինի, միշտ կլինի տեխնոլոգիայի հանճարեղ մասնագետ, որը կարող է կոտրել այն պաշտպանական համակարգը, որ դու կիրառել ես: Եվ սա խիստ չի տարբերվում այն իրավիճակից, որն ունեինք ինտերնետից առաջ, քանի որ միշտ 100-տոկոսանոց անվտանգ չենք եղել: Այնուամենայնիվ մենք կարող ենք ավելի անվտանգ  պայմաններ ստեղծել, քան ունենք այժմ: Ինչ եմ արել դրա համար ես. տարիներ առաջ, երբ ոչ ոք դրա  վրա ուշադրություն չէր դարձնում, ես փորձում էի գնահատել անվտանգային այն համակարգերը, որոնք հնարավորություն էին տալիս անվտանգ լինելու: Հայաստանի նման երկրում շատ կարևոր է, որ մենք կարողանանք հասնել 90-98 տոկոս անվտանգության, քանի որ այստեղ մոտ 3մլն բնակչություն է, աշխարհագրական տարածքն էլ փոքր է: Եվ այս պարագայում անվտանգության սխեմա մշակելն ավելի հեշտ է, քան ամբողջ Եվրոպայի համար: Ո՞րն է ամենատարրական մակարդակում կիբեռանվտանգության ապահովումը: Դրա համար անհրաժեշտ է կառուցել բուրգային սխեմա և առաջին պաշտպանությունն իրականացնել դրսից»,- նշեց Ջուլիանին:

Ջուլիանիի խոսքով՝ ԱՄՆ-ի հիմնական խնդիրն այն է, որ այնտեղ անընդհատ վախենում են նրանից, որ ինչ-որ մեկը կկարողանա մուտք գործել իրենց էլեկտրոնային, բանկային  համակարգ:

Տիգրան Սարգսյանը նրանից հետաքրքրվեց, թե արդյո՞ք կան ԱՄՆ-ի և ԵԱՏՄ-ի միջև համագործակցության հնարավորություններ կիբեռանվտանգության ոլորտում:

«Չեմ կարող ասել այո կամ ոչ: Մի փոքր պատրաստակամության պակաս կա:  Ես կիբեռանվտանգության գաղտնիքներով կիսվելու մեջ ռիսկեր չեմ տեսնում»,- նշեց նա: