Փաշինյանը ռիսկի է դիմում. ի՞նչ սպասել վաղը

Վերլուծական 23 Հոկտեմբեր, 2018 18:00

Ազգային ժողովի «Ելք» խմբակցությունը, խորհրդակցելով իրավաբանների հետ, որոշել է վարչապետի թեկնածու առաջադրել Նիկոլ Փաշինյանին: Նման սցենարը կանխատեսելի էր և արդեն իսկ բուռն քննարկման էր արժանացել փորձագետների շրջանում: Փաշինյանի թեկնածության առաջադրումը ոչ միայն ապահովագրության, այլև իրավական փակուղուց խուսափելու համար է: Առանց առաջին փուլում թեկնածուի առաջադրման, քվեարկության և չընտրվելու փաստի արձանագրման, երկրորդ փուլը չի կարող սկսվել, քանի որ 7-օրյա ժամկետի սկիզբը դրված է քվեարկության պահից: Այսպիսով, Փաշինյանը գնում է իրավական կազուսներից խուսափելու, միևնույն ժամանակ՝ անչափ ռիսկային ճանապարհով:

Որևէ մեկը չի կարող բացառել, որ վարչապետի ընտրության ժամանակ ՀՀԿ-ն իր անկախ պատգամավորներով հանդերձ, ՀՅԴ-ն էլ նրանց հետ, զերծ մնալով սեփական թեկնածուին առաջադրելուց, միևնույն ժամանակ՝ կընտրեն Նիկոլ Փաշինյանին: Իրականում, քաղաքական-սահամանադրական փակուղին կսկսվի հենց այդ պահից, քանի որ Փաշինյանը կսպառի ԱԺ-ն օրինական և իրավական ճանապարհով ցրելու բոլոր հնարավորությունները: Արդյունքում՝ նրան սպասվելու է մեկ տարի ևս աշխատելը հենց այս ներկապնակով խորհրդարանի հետ, ինչը, համաձայնեք՝ քաղաքական դժոխք է, քանի որ օրենսդիր-գործադիր կապն արդեն իսկ կարելի է խզված համարել; Այս պայմաններում՝ յուրաքանչուր՝ անգամ ոչ սահմանադրական օրենքի քննարկումը և ընդունումը ԱԺ-ում, Փաշինյանի համար փորձություն է լինելու: Բացի այդ, ՀՀԿ-ն փայլուն հնարավորություն կունենա մայիսին անվստահություն հայտնելու Փաշինյանի կառավարությանը և միանգամայն օրինական ճանապարհով վերջինիս հեռացնելու իշխանությունից:

Ի՞նչ կարող է Փաշինյանը հակադրել հակահեղափոխությանը: Իրականում, անգամ հանրության մի ստվար զանգվածի փողոց դուրս բերելը չի կարող այս պարագայում խնդրի լուծում համարվել, քանի որ քաղաքականության մեջ սեփական կամքը ընդդիմախոսներին պարտադրելու համար անհրաժեշտ է կամ նախապես շատ ճիշտ հաշվարկներ կատարել և ըստ այդմ՝ հակառակորդներին գցել ծուղակը և ոչ թե երկու ոտքով այնտեղ հատնվել, կամ էլ՝ կոնսենսուսի գնալ: Այն փաստը, որ Փաշինյանը իր հաշվարկներում ի սկզբանե սխալվել էր ՝ արդեն ուրվագծվում է և եթե վաղը ՀՀԿ-ն իրագործի հենց վերոնշյալ սցենարը, Փաշինյանին կմնա միայն մեկ տարբերակ՝ գնալ զիջումների: Իհարկե, կա երրորդ տարբերակ՝ պնդել սեփական տեսլականը և դրանով իսկ երկիրն ու հասարակությանը տանել քաղաքացիական բախման: Մնում է հուսալ, որ այս տարբերակը բոլոր կողմերի համար էլ բացարձակապես անընդունելի է…

Ս.Խաչատրյան