Կոնֆլիկտով համագումարի չեն գնա. ԵԿՄ նիստը ձգձգվում է

Երկրապահ կամավորականների միության համագումար նիստը հերթական անգամ ձգձգվում է, իսկ ներքին խմորումները չեն դադարում: Ինչպես արդեն տեղեկացրել էինք, ԵԿՄ փոխնախագահ Ղուկաս Ուլիխանյանի փոխանցմամբ, նիստը պետք է տեղի ունենար դեռ այս ամսվա առաջին կեսին: 

ԼՈՒՐԵՐ.com-ը կրկին զրուցեց ԵԿՄ փոխնախագահի հետ, պարզելու, թե որն է համագումար նիստի հերթական հետաձգման պատճառը: Վերջինս ձգձգումը մեկնաբանեց որպես քննարկումների հետևանք: 

«Այո՛, պետք է նիստը տեղի ունենար այս ամսվա կեսին և դրա ընթացքում էլ պետք է ընտրվեր ԵԿՄ նախագահ, սակայն մենք դեռևս քննարկումների մեջ ենք»,-մանրամասնեց ԵԿՄ փոխնախագահը: 

Իսկ ԵԿՄ լրատվության բաժնից մեզ հետ զրույցում հույս հայտնեցին, որ գոնե մինչև տարեվերջ կլինի նիստը. «Նիստի նշանակման ուղղությամբ աշխատանքներ են տարվում: Բանակցությունները դեռևս չեն ավարտվել փոխնախագահների, կառույցների և հավակնություն ունեցող մնացած բոլոր կազմակերպությունների միջև: Ինչպես գիտեք՝ խնդիր էր դրված վերամիավորվել ԵԿՄ կազմակերպություններին: Մենք կոնֆլիկտով համագումարի չենք գնա, հարցերը կլուծենք, նոր համագումարը կկայանա»,-բացատրեցին ԵԿՄ լրատվության բաժնից՝ հավելելով, որ  իրենց նպատակն է միավորել ազատամարտիկներից կազմված մյուս ՀԿ-ներին: 

Հիշեցնենք, որ ԵԿՄ նախագահի պաշտոնի համար պայքարում են Սպարապետ Վազգեն Սարգսյանի եղբայրը՝ Արամ Զավենի Սարգսյանը, ԱԺ ԵԼՔ խմբակցության պատգամավոր Սասուն Միքայելյանը և «Կոռնիձոր» ջոկատի հրամանատար Արա Խուդավերդյանը (Կոռնիձորի Արո):

Արմինե Միքայելյան