Փաշինյանը «կոտրեց» ՀՀԿ-ին. ի՞նչ տեղի ունեցավ այսօր ԱԺ-ում

Ազգային ժողովում վարչապետի ընտրության քվեարկության արդյունքները հետեւյալն են՝ կողմ 0, դեմ 1, ձեռնպահ՝ 11: ՀՀԿ, ՀՅԴ եւ «Ծառուկյան» խմբակցությունները հրաժարվեցին քվեարկությունից, ԵԼՔ դաշինքը հայտարարեց, որ քվեարկելու է ձեռնպահ: ԱԺ նախագահ Արա Բաբլոյանը հումորով շնորհավորեց վարչապետ չընտրելու կապակցությամբ: Հիշեցնենք, որ միակ թեկնածուն Նիկոլ Փաշինյանն էր: Յոթ օր անց ԱԺ-ն կրկին պետք է քվեարկի, եւ վարչապետ չընտրելու դեպքում լուծարվելու է:

Այս պահին ամեն ինչ ընթանում է վարչապետի պաշտոնակատարի նախատեսած սցենարով: Սա, իհարկե, չի նշանակում, որ հակահեղափոխությունն իրենից այլևս վտանգ չի ներկայացնում, կա դեռ երկրորդ փուլը, որտեղ անակնկալները բացառել չի կարելի այն պարզ պատճառով, որ երկրում և հատկապես նախկին իշխանությունների մոտ իրավիճակը վերջերս շատ հաճախ է փոխվում: Այսօր Փաշինյանի արած շեշտադրումները միտված էին հենց նման սցենարը բացառելուն: Միևնույն ժամանակ, ՀՀԿ-ն, որ սովոր էր գործել մեկ կենտրոնից եկող հանձնարարականով, ներկայում չունի այդ կենտրոնը: Սակայն դա բնավ էլ չի նշանակում, որ ՀՀԿ-ն ավելի կանխատեսելի է դառնում. բանն այն է, որ այժմ հանձնարարականները գալիս են տարբեր կենտրոններից՝ ցայտնոտի մեջ գցելով հենց հանրապետականներին: Այսօր նաև պարզ դարձավ, որ հանրապետականների նման քվեարկության հիմքում ոչ թե վերջիններիս բարի կամքի դրսևորումն էր, այլ իշխանության կողմից այս օրերի ընթացքում կատարած պրոֆիլակտիկ աշխատանքների, կամ, եթե կուզեք՝ հակազդող գործողությունների արդյունքը: Պտահական չէր, որ Փաշինյանը ակնարկեց՝ իրենց քաջ հայտնի է, թե այս օրերին ինչպիսի ստվերային հանդիպումներ և բանակցություններ են ունեցել նախկին իշխանության ներկայացուցիչները, այդ թվում՝ Հրայր Թովմասյանի գլխավորած Սահմանադրական դատարանում:

Ուշագրավ է նաև այն փաստը, որ  քաղաքական ուժերը նախընտրեցին ոչ թե դեմ, այլ ձեռնպահ քվեարկել Փաշինյանի թեկնածությանը: Սա խոսում է այն մասին, որ ոչ ՀՅԴ-ն, ոչ ԲՀԿ-ն, ոչ էլ, առավել ևս՝ ՀՀԿ-ն, չեն ցանկանում «Նիկոլին դեմ եք» պիտակավորմանն արժանանալ: Իհարկե, հասկանալի է, որ այս համատեքստում նման մեկնաբանությունը մեղմ ասած՝ աբսուրդ է, սակայն գաղտնիք չէ, որ մեր հասարակության մեջ կամ խմբեր, որոնք կարող են անգամ նման իրավիճակը շրջել ի օգուտ իրենց:Մյուս կողմից, չի կարելի բացառել, որ հանրապետականը ձեռնպահ քվեարկելու այլ մոտիվացիա ևս ուներ, մասնավորապես՝ հետագայում նախկին իշխանավորները կարող են հայտարարել, որ Փաշինյանի առաջ քաշած և պարտադրված կեղծ օրակարգի հետ նրանք որևէ առնչություն չեն ունեցել...

Ս.Խաչատրյան