Խաղադրույք են կատարել նրա վրա, թե ճանճը որ ուղղությամբ կթռնի. Արտակ Զեյնալյանը՝ քրեակատարողական հիմնարկներում մոլախաղերի մասին

 Հայաստանի Հանրապետության արդարադատության նախարար Արտակ Զեյնալյանը վստահեցնում է, որ քրեակատարողական հիմնարկներում դատապարտյալներին և կալանավորներին մոլախաղեր խաղալ հարկադրելու կամ չխաղալու համար տուրք վճարելու ավանդույթը ամենաբարձր մակարդակով վերացվել են:

Նախարարի պաշտոնակատարն այդ մասին ասաց Ազգային ժողովում կառավարության հետ հարցուպատասխանի ժամանակ՝ պատասխանելով «Ելք» խմբակցության պատգամավոր Ալեն Սիմոնյանի հարցին:

«Այն ավանդույթը, որ կար քրեակատարողական հիմնարկներում՝ հարկադրել խաղալ կամ տուրք վճարել չխաղալու համար, ամենաբարձր մակարդակով վերացված է, սակայն եթե խցերում մոլախաղեր են խաղում, դա ամբողջությամբ հնարավոր չէ վերացնել: Արգելված իրերը, խաղաքարտեր, այն ամենը ինչ հնարավոր է առգրավել, քրեակատարողական հիմնարկներում առգրավվում է: Սակայն նկատվել է այսպիսի երևույթ՝ ամեն ինչ վերացնելու պարագայում ուղղակի կարող են խաղալ, խաղադրույք կատարել սպորտային խաղերի վրա: Անգամ բացահայտվել է դեպք, որ խաղադրույք են արել, թե նստած տեղից ճանճը որ ուղղությամբ կթռնի»,- ասաց նախարարը:

Արտակ Զեյնալյանն անդրադարձավ նաև քրեակատարողական հիմնարկների ծանրաբեռնվածության մասին պատգամավորի հարցին՝ շեշտելով, որ այդ խնդիրը ևս լուծվել է. «Քրեակատարողական հիմնարկներում այսօրվա դրությամբ 1920 մարդ է մնացել: Այսպիսի ցածր ցուցանիշ առանց համաներում իրականացնելու Հայաստանի քրեակատարողական հիմնարկներում չի եղել: Սա մեր իրականացրած քաղաքականության արդյունքն է,  դատական համակարգում իրավակիրառական պրակտիկան փոխելու արդյունք է: Նաև այն չափով և այն ծավալով չի կիրառվում կալանքը, որքան նախկինում:  Օգտագործվում են նաև այլընտրանքային խափանման միջոցներ, սա երկրում իրականացված բարեփոխումների դրսևորումն է»,- ասաց նախարարի պաշտոնակատարը: