Արարատի մարզում ընդհատված շինարարական աշխատանքները կշարունակվեն հաջորդ տարի

Արարատի մարզում կան ընդհատված շինարարական ծրագրեր, որոնց շինարարների հետ Արարատի մարզպետարանը միակողմանի խզել է պայմանագրերը՝ ժամանակին պարտավորությունները պատշաճ չկատարելու պատճառով:

Շինարարական աշխատանքների մի մասը սկսվել էր 2016թ-ին, մյուս մասը՝ 2017 թվականին: Արարատի մարզպետարանի աշխատակազմի քաղաքաշինության վարչությունից «Արմենպրես»-ի թղթակցին տեղեկացրեցին, որ այդ աշխատանքներն այս պահին գտնվում են կիսավարտ վիճակում, իսկ խնդրի լուծումը՝ դատական գործընթացում: «Այս աշխատանքներն իրականացնելու համար պայմանագիր էր կնքվել «Մոնոլիտկապիտալշին» ՍՊԸ-ի (6 օբյեկտ), «Նորակ» ՍՊԸ-ի (2 օբյեկտ) եւ «Վահրադյան Շին» ՍՊԸ-ի հետ:

Վերջինիս հետ կնքված պայմանագրի հիման վրա 2017 թվականի օգոստոսին սկսվել էին Արարատ քաղաքի Զոդի բանավանի դրենաժային համակարգի կառուցման աշխատանքները: Աշխատանքները ժամանակին չկատարելու եւ պայմանագրի ժամկետը խախտելու պատճառով մարզպետարանի կողմից միակողմանի լուծվել է պայմանագիրը, իսկ ամբողջական գումարը՝ 81 մլն դրամը վերադարձվել պետբյուջե»,- նշել վարչությունում:

Վերոնշյալ մյուս օբյեկտները, որոնց մեջ են մտնում Արտաշատի թատրոնի հիմնանորոգումը, Արտաշատի թիվ 1, Դալարի եւ Գեղանիստի մանկապարտեզների, Արմաշի եւ Շահումյանի դպրոցների շինարարությունը՝ ընդհատված եւ կիսավարտ վիճակում են: Կատարված աշխատանքների համար պետբյուջեից արդեն իսկ վճարվել էր 134 մլն 300 հազար դրամ, իսկ 111 մլն 300 հազար դրամ չօգտագործված գումարը պայմանագրի խզումից հետո վերադարձվել է: Վարչության աշխատակիցների խոսքով՝ անկախ նրանից, թե ինչպես կհանգուցալուծվի դատական գործընթացը, կրկին նույն շինարարական կազմակերպություններին կթույլատրվի ավարտել աշխատանքները, թե՝ ոչ, հաջորդ տարվա ծրագրով կավարտվեն շինարարությունները:

«Այս ամենի պատճառով նշյալ համայնքներում ընդհատվել է մանկապարտեզների գործունեությունը, դպրոցներում ստեղծվել են բազմաթիվ անհարմարություններ: Մենք էլ օր առաջ ակնկալում ենք խնդրի անհապաղ լուծում»,-ընդգծեցին նրանք: