Ուրցաձորում շիլաշփոթ է․ մարզպետը «մեկ որոշմամբ ամբողջ գյուղը խառնել է իրար»

Կառավարության շենքի դիմաց բողոքի ակցիա են իրականացնում Արարատի մարզի Ուրցաձոր համայնքի բնակիչները: Վերջիններս բողոքում են Արարատի մարզպետ Գարիկ Սարգսյանի որոշման դեմ՝ Գևորգ Ավետիսյանին նշանակել Ուրցաձորի համայնքապետի ժամանակավոր պաշտոնակատար:

«Գյուղապետարանի աշխատակազմը առանց գյուղապետի նորմալ աշխատում էր, և այնպես չէր, որ հրաժարականից հետո ցուցարարներն ակնկալիք ունեին, որ իրենց միջից պաշտոնակատար էր նշանակվելու: Իրենց պահանջը միայն գյուղապետի հրաժարականն էր, այդ մարդը տվեց հրաժարական: Իսկ մարզպետը, ցուցարարների միջից մեկին պաշտոնակատար նշանակելով, ամեն ինչ խառնեց իրար, մեր գյուղում շիլաշփոթ է: Մեկ որոշմամբ ամբողջ գյուղը խառնել է իրար»,- ասաց բողոքի ակցիայի մասնակիցներից մեկը:

Բնակիչները նշում են, որ նախկին համայնքապետ Ռաֆիկ Անդրեասյանը հրաժարական տվեց, որ Ուրցաձորում լարվածությունը թուլանա, իսկ ժամանակավոր պաշտոնակատարի նշանակմամբ գյուղում կրկին իրավիճակը լարվել է:

Դիտարկմանը՝ թե նրանք տեղյա՞կ են վարչապետի այն հայտարարությանը, որ եթե դեմ են գործող համայնքապետին, պետք է ստորագրահավաք կազմակերպել, ակցիայի մասնակիցը պատասխանեց․ «Մենք պատրաստ ենք դրան, ուղղակի մեզ պետք է, որ մեր ձայնը լսելի լինի և մեզ ժամանակ տան։ Այս պահին ոստիկանությունը գյուղապետարանի շենքը փակել է և մենք չգիտենք՝ ինչ է կատարվում»։

Ակցիայի մասնակիցների խոսքով՝ նրանք երեք օր պահանջում են, որպեսզի մարզպետը գա և բացատրի իր որոշումը։