Ձևավորվում է նոր քաղաքական մշակույթ. Թևան Պողոսյանը՝ ՀՀ նախագահի կողմից ՍԴ դիմելու գործընթացի մասին
Հայաստան
ՀՀ նախագահ Արմեն Սարգսյանը պաշտոնը ստանձնելու օրվանից նոր քաղաքական մշակույթ է ձևավորել: Այս մասին նշեց Մարդկային զարգացման միջազգային կենտրոնի նախագահ Թևան Պողոսյանը, մեկնաբանելով ՀՀ սահմանադրության պահանջներին «Ազգային ժողովի կանոնակարգ» օրենքում լրացումներ և փոփոխություններ կատարելու մասին» օրենքի համապատասխանության հարցը որոշելու համար ՀՀ նախագահ Արմեն Սարգսյանի կողմից Սահմանադրական դատարան դիմելու գործընթացը:
«Որդեգրվել է նոր մոտեցում, որ այսուհետ որևէ փաստաթուղթ, որ եկել է, դիտարկվելու է ոչ թե առանձին կատարված փոփոխությունով, այլ ամբողջությամբ՝ իր բոլոր դրույթներով: Եթե կա խնդիր, անհամապատասխանություն, ապա ողջունելի քայլ է, երբ փաստաթուղթը ներկայացվում է Սահմանադրական դատարան: «Կանոնակարգ օրենք»-ում կան տարբեր մեկնաբանությունների տեղիք տվող դրույթներ: Դրանից բացի, այս օրենքը լուրջ քննարկումների, քննադատության տեղիք տվեց, հետևաբար հատկապես ավելի մեծ ուշադրությամբ ուսումնասիրվեց»,-ասաց Թևան Պողոսյանը: Նրա խոսքով, այս որդեգրած մոտեցումը գովելի է, ավելին, պետք է հետամուտ լինել, որ այս մոտեցումը շարունակվի և դառնա մնացած բոլոր պետական ինստիտուտների քաղաքական աշխատանքի մշակույթը: Նա ընդգծեց, որ մեզանում պետք է ամրապնդվի Սահմանադրական դատարան դիմելու մշակույթը:
Թևան Պողոսյանը կարևորեց նաև օրենսդրական մոնիտորինգի մեխանիզմներ ներդնումը:
«Օրենքի նախագիծը ներկայացվում է, բայց երբ այն ընդունելուց հետո ազդեցությունների դաշտն ես դիտարկում, ապա տեսնում ես, որ տեխնիկական խնդիրներ կան: Չկա մոնիտորինգի մեխանիզմ, որով կարելի է գնահատել, ասենք մեկ տարի հետո արդյոք այն իր նպատակին ծառայել է»,-ասաց Թևան Պողոսյանը: Նա հույս հայտնեց, որ նոր քաղաքական մոտեցման պարագայում նոր ընտրված Ազգային ժողովը կսկսի ավելի լուրջ վերաբերել ցանկացած օրենքի նպատակին, կարգավորումներին, ազդեցություններին: Ըստ դրա էլ կներմուծվի օրենսդրական մոնիտորինգի ինստիտուտը, որը թույլ կտա հսկողություն կազմակերպել:
«Մեկ տարուց ավելի է Մարդկային զարգացման միջազգային կենտրոնն իրականացնում է Ազգային ժողովի կարողությունների հզորացման ծրագիր: Մենք արդեն այս ծրագրի շրջանակում նախապատրաստել ենք հետազոտություններ, վերլուծություններ, նախագծեր և հույս ունենք, որ նոր Ազգային ժողովը դրանք կստանձնի և կտանի առաջ»,-ասաց նա:
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
