Մարությանը փոշմանե՞լ է. ի՞նչ ճակատագիր է սպասվում «Սանիթեք»-ին

Երեւանի քաղաքապետ Հայկ Մարությանի «նախընտրական մեխը» ավագանու ընտրությունների քարոզարշավի ընթացքում՝ Երևանը աղբից մաքրելու խոստումն էր: Հայտնի դերասանը չէր զլանում գրեթե յուրաքանչյուր հանդիպման ընթացքում համայնքների բնակիչների առջև բարձրաձայնել իր մտահոգությունը այս հարցի շուրջ: Մարությանը հայտարարում էր, որ պայմանագիրը «Սանիթեք» ընկերության հետ պետք է վերանայվի՝ դա նաև երևանցիների մեծամասնության ցանկությունն է, մյուս կողմից՝ Մարությանը պնդում էր, որ աղբահանության ևս մեկ օպերատոր է պետք, ինչը ոչ միայն առավել արդյունավետ կդարձնի աղբահանության գործընթացի կարգավորումը մայրաքաղաքում, այլ նաև ոլորտում մրցակցային բաղադրիչ կավելացնի:

 

Այսօր, սակայն, տպավորություն է, որ Մարությանը փոշմանել է: Ավագանու վերջին նիստում «Սանիթեք» ընկերության կողմից իրականացվող աղբահանության և սանմաքրման աշխատանքները գնահատելով անբավարար՝ Հայկ Մարությանը նշել է, որ այս ուղղությամբ պետք է ավելի խստացվի վերահսկողությունը: Վերահսկողության խստացումը ենթադրում է, որ «Սանիթեք»-ին ամեն ամիս տուգանելու են, իսկ ընկերությունը շարունակելու է «գլուխ պահել»: Տպավորություն է, որ «Սանիթեք»-ի ղեկավարությունը ոչ միայն յուրացրել է «թքած ունենալու նուրբ արվեստը», այլև շատ լավ հասկանում է, որ Երևանի քաղաքապետարանի գործիքակազմը տույժ ու տուգանքներից այն կողմ չի գնալու: Իսկ Երևանցիները թող շարունակեն «դուխով» խեղդվել հարազատ քաղաքի գարշահոտության մեջ: Բացի այդ՝ «Սանիթեք»-ի կողմից սաբոտաժ անելու ակնարկները հենց իշխանական կուլիսներից էին հնչում, շշուկներ էին պտտվում անգամ, որ «Սանիթեք»-ը պատկանում է ոչ ավել, ոչ պակաս՝ Տարոն Մարգարյանին, իսկ այժմ պարզվում է՝ ոչ մի սաբոտաժ էլ չկար, ուղղակի վերահսկողությունն էր թույլ՝ թողեք մարդիկ աշխատեն…