«Ամեն եռամսյակը մեկ՝ նմանօրինակ մի նյութ հրապարակում են իմ դեմ». Առուշ Առուշանյան

Մամուլում երեկվանից տեղեկություններ սկսեցին տարածվել այն մասին, որ Գորիսի քաղաքապետ Առուշ Առուշանյանն ու ավագանու անդամ Արտակ Առուշանյանը ծեծի են ենթարկել ավագանու անդամ Լյովա Արզանյանին: Նշվում է, որ վեճը եղել է կենցաղային հարցերի շուրջ, իսկ դեպքի մասին էլ առաջինը ոստիկանությանը հայտնել է Լյովա Արզանյանը: 

ՀՀ Ոստիկանությունից մեզ փոխանցել են, որ նյութեր են նախապատրաստում կատարվածի մանրամասները ճշտելու համար: 

Գորիսի քաղաքապետ Առուշ Առուշանյանը ԼՈՒՐԵՐ.com-ի հետ զրույցում հերքեց իր մասին տարածված բոլոր տեղեկությունները. «Նման միջադեպ, առավել ևս՝ ավագանու հետ կապված որևիցե խնդիր՝ չի եղել: Ես չգիտեմ՝ ո՞վ է պատվիրում այդ նյութերը, ինչի՞ է պատվիրում»:

Մեր այն դիտարկմանը, թե որոշ հրապարակումներում նշվում է, որ ոստիկանությանը դեպքի մասին առաջինը հայտնել է ավագանու անդամ Լյովա Արզանյանը, Առուշ Առուշանյանը կրկին հերքեց. «Սխալ ինֆորմացիա ա, նման բան գոյություն չունի: Մի բան եթե չի եղել, ուրեմն չի եղել, ինչքան էլ ուզենան սարքել: Այսօր, որ Գորիսում մթնոլորտը շատ դրական է՝ շատ խելք պետք չէ դա տեսնելու և հասկանալու համար: Իմ առաքելությունը քաղաքը շենացնելն է և համայնքի բնակիչների 97%-ից ավելին ինձ է ընտրել ու դեռևս դժգոհություններ չկան ինձ հետ կապված: Ես հավաստիացնում եմ՝ եթե մեր համայնքի բնակչության թեկուզ 10%-ը պահանջի իմ հրաժարականը, ես անմիջապես աշխատանքից ազատման դիմումս կգրեմ»:

Առուշանյանը պնդեց, որ իր մասին տարածված նյութերը պարզապես հակաքարոզչություն է, և որ նմանատիպ նյութերն ընթերցում է միայն ժպիտով. «Ամեն եռամսյակը մեկ՝ նմանօրինակ մի նյութ հրապարակում են իմ դեմ»:  

Արմինե Միքայելյան