Ինձ ասացին` կներես, քանի որ մամուլում քո մասին ինչ-որ բաներ են տարածվում՝ չենք կարող քեզ Արաբկիր վարչական շրջանի ղեկավար նշանակել․ Արշակ Օրդուխանյան

Մամուլում և սոցցանցերում շրջանառված ապատեղեկատվության պատճառով՝ Արաբկիր վարչական շրջանի ղեկավար չեմ նշանակվել։ Այս մասին ԼՈՒՐԵՐ․com-ի թղթակցի հետ զրույցում ասաց «Քաղաքացիական պայմանագիր» կուսակցության Արաբկիրի գրասենյակի ղեկավար Արշակ Օրդուխանյանը։

«Այո՛, իմ թեկնածությունը քննարկվել է։ Ինձ կանչել են, ներկայացրել են, դիմումը գրել են, դրանից հետո ինձ ասացին կներես, քանի որ մամուլում քո մասին ինչ-որ բաներ են տարածվում՝ չենք կարող քեզ Արաբկիր վարչական շրջանի ղեկավար նշանակել»,-նշեց նա։

Օրդուխանյանը նկատեց, որ իր մասին տարածել են կեղծ տեղեկություններ, թե նախկինում ապրել է արտասահմանում, ունեցել է մութ, հանցագործ անցյալ։

«Անուններ չեմ ցանկանում տալ, սակայն վստահ եմ, թե ով է դրա հետևում կանգնած։ Այդ տղայի հետ դատական պրոցեսի մեջ եմ․ ես իրեն դատի եմ տվել, որովհետև գումար է պարտք և հասկանում է, որ պետք է գումարը վերադարձնի․ ուզում է վատություն անել»,-ասաց Օրդուխանյանը։

Հարցին՝ այդ լուրերը ազդե՞լ են իր հանդեպ քաղաքապետ Հայկ Մարությանի վերաբերմունքի վրա՝ Օրդուխանյանը պատասխանեց․

«Վերաբերմունքի փոփոխություն չի եղել, ոչ ոք հետս այդ թեմայով չի խոսել։ Հայկ Մարությանին, իր թիմին գրել են, նրանք հավատացել են։ Ես, ուղղակի, հանրությանն իմ պարզաբանումն եմ ներկայացնում, որ ինչ ներակայացվում է՝ սուտ է։ Ինձ համար կարևորը իմ անունն ու հեղինակությունն է»։

Իսկ Մարությանի հետ այդ հարց քննարկելու վերաբերյալ ասաց․

«Նա դեռ  շատ զբաղված է՝ առիթ չի եղել խոսելու։ Երեք օր առաջ  է եղել, որ ասել են՝ քեզ չենք նշանակի, նույնիսկ հրամանը իջեցրած են եղել, կանչեցին, ասացին՝ չի լինի»։

Օրդուխանյանն ասաց, որ նա  ՔՊ-ին ու թավշյա հեղափոխությանը հեղափոխությանըմիացել է եղել դեռ ապրիլի 15-16-ից։

«Երբ բոլորն իրենցից երես էին թեքել, ես այդ ժամանկ միացել եմ հեղափոխությանը։ Ես այդպես էի մտածել, կամ երկիրը պետք է դզվի, կամ ես երկրից կգնամ, եթե արդյուքն չլինի․ գնամ ու դրսից պայքարեմ»,-հավելեց նա։

Սակայն Օրդուխանյանին վերջին իրադարձությունները չի հիասթափեցրել, ինչպես՝ նա է նշում․ «Ինձ կնշանակեն, թե չեն նշանակի՝ կարևոր չէ։ Իմ նպատակներն այլ են»։

Իսկ նրա նպատակը Ազգային ժողովի ընտրություններում ակտիվ մասնակցություն ունենալն է, և օգնել Նիկոլ Փաշինյանին, որ հաղթանակը ունենա իր տրամաբանական ավարտը։

Արմինե Արմենակյան