Շիրակի մարզում կարկուտից տուժած 3 համայնք կստանա դրամական աջակցություն

Հայկական Կարմիր խաչի ընկերության(ՀԿԽԸ) կողմից Շիրակի մարզում կարկուտից տուժած 3 համայնք՝ Առափին, Սառնաղբյուրը և Նահապետավանը, կստանան դրամական աջակցություն: Սրանք այս տարի կարկտահարությունից ամենաշատ տուժած համայնքներն են:

Այս մասին տեղեկացրեց Հայկական Կարմիր խաչի ընկերության լրատվական բաժինը։ Այս համայնքներում ամենաշատը տուժած 1097 ընտանիք՝ ընդհանուր առմամբ 5012 մարդ, կստանան դրամական աջակցություն՝ յուրաքանչյուրը 22 440 դրամ (46 շվեյցարական ֆրանկ): Հայկական Կարմիր խաչի ընկերությունը, տվյալ համայնքերին աջակցելու նպատակով, դիմել էր Կարմիր խաչի և կարմիր մահիկի ընկերությունների ֆեդերացիայի Աղետներին արձագանքման արտակարգ ֆոնդին և ստացել դրական պատասխան: Գումարը կտրամադրվի բանկի միջոցով:

Ինչպես տեղեկացնում է «Արմենպրես»-ը՝ սա Հայկական Կարմիր խաչի ընկերության միակ ծրագիրը չէ, որ այս պահին իրականացվում է Շիրակում. ՀԿԽԸ-ն, Շիրակի մարզային մասնաճյուղի միջոցով, բազմաբնույթ ծրագրեր է իրականացնում՝ տարբեր ուղղություններով:

Մասնաճյուղի գործադիր տնօրեն Սամվել Մադոյանը, «Արմենպրես»-ին ներկայացնելով դրանք, առանձնացրեց «Համայնքային ինտեգրացված տնային խնամք և առողջ ծերացում» ծրագիրը, որն ուղղված է տարեցների, հաշմանդամություն կամ քրոնիկ հիվանդություն ունեցող անձանց համար սոցիալ - առողջապահական տնային խնամքի մոդելի ներդրմանը, ինչպես նաև համայնքներում ակտիվ ծերացման քարոզչությանը: Այս ծրագրում ընդգրկված է 60 շահառու:

«Ծրագրի առաջին բաղադրիչը՝ Համայնքային ինտեգրացված տնային խնամք, այս պահին Շիրակի մարզում իրականացվում է միայն Գյումրի քաղաքում: Ծրագրում ընդգրկված շահառուները՝ մեր թիմի կողմից, որը բաղկացած է բուժքույրից, սոցիալական աշխատողից և կամավորից, ստանում են համապատասխան օգնություն և խնամք՝ իրենց սեփական տանը», - նշեց պատասխանատուն հավելելով, որ եթե այս շահառուները սպասարկվում են անվճար, ապա նպատակ կա առաջիկայում ծրագիրն ընդգրկել նաև այն շահառուներին, ովքեր պատրաստ են ծառայության դիմաց վճարել, ինչն էլ կօգնի ընդլայնել ծառայությունը և ավելացնել ծառայությունից օգտվող անապահով տարեցների թիվը։ Ծրագրի երկրորդ բաղադրիչը՝ առողջ ծերացում, իրականացվում է մարզի 5 համայքում՝ Ամասիա, Սպանդարյան, Արթիկ, Փանիկ, Նորկյանք և Հոռոմ: Բոլոր համայնքներում արդեն կան նախաձեռնող խմբեր: Կազմակերպությունը Շիրակում աշխատում է նաև աղետների կառավարման ոլորտում՝ ստեղծելով համայնքային արձագանքման կամավորական թիմեր, դպրոցներում իրականացնում է աղետների ռիսկերի և Կարմիր խաչի պատմության և հիմնարար սկզբունքների վերաբերյալ դասընթացներ,  սատարում է անհայտ կորածների ընտանիքներին, սիրիահայերին և այլ խոցելի խմբերի։