Հարուստները կհարստանան, իսկ աղքատնե՞րը...

Վերլուծական 27 Հոկտեմբեր, 2018 13:25

Գաղտնիք չէ, որ մինչ Հայաստանում տեղի ունեցած թավշյա հեղափոխությունը, սոցիալական ապահովության ոլորտը համարվում էր ամենակոռումպացվածը, իսկ գերատեսչությունը՝ գրեթե կոռուպցիայի և կաշառակերության որջ: Նախկինում ընդդիմադիր, այսօր արդեն իշխանության եկած գործիչները տարակուսանք էին հայտնում, թե ինչպես պատկան մարմինները մանրադիտակի տակ չէին առնում մամուլում գրեթե յուրաքանչյուր օր հրապարակվող տեղեկությունները, որոնք իրականում ոչ այլ ինչ էին, քան հաղորդում հանցագործությունների մասին:

Այժմ, հեղափոխությունից հետո տարակուսելու հերթը հանրությանն է: Աշխատանքի և սոցիալական ապահովության նախարար Մանե Թանդիլյանը այս ընթացքում անչափ պասիվ է իր հակակոռուպցիոն պայքարում՝ ի տարբերություն իր մյուս գործընկերների: Օրինակ, Թանդիլյանը չի կարող տեղեկացված չլինել, որ անապահովության նպաստի, կամ՝ «Փարոս» ծրագրի ցուցակները շուտվանից «սանրվելու» կարիք ունեն այն պարզ պատճառով, որ տարիներ շարունակ՝ իրականում անապահով խավերի փոխարեն, այս ծրագրից օգտվել են սոլիդ եկամուտ ունեցող քաղաքացիները: Ի՞նչ է սա, եթե ոչ կոռուպցիոն ռիսկեր: Բացի այդ, համակարգը 30.01 միավոր ունեցող ընտանիքին տրամադրում է ընտանեկան նպաստ, իսկ դրանից ընդամենը 1 հարյուրերորդական միավորով նվազ միավոր ունեցողին` զրկում նպաստից: Սա էլ իր հերթին է լրացուցիչ կոռուպցիոն ռիսկ` ամեն գնով ստանալու բաղձալի 0.01 միավորը:

Համատարած կոռուպցիայի մեջ թաղված ոլորտում մեկ-երկու մարզային տեսուչների ձերբակալումը չի կարող խնդրի լուծում հանդիսանալ, քանի որ բոլորն էլ քաջ գիտեն՝ «կերել են» թաղապետարանի սոցաշխատողից մինչև նախարարության ամենավերին օղակներ: Արդյո՞ք այս փաստը Թանդիլյանին չի մտահոգում, երբ նա, օրինակ, հպարտորեն հայտարարում է, թե շուտով նպաստները բարձրացնելու հնարավորություն կունենանք: Ողջունելի նախաձեռնություն է, ինչ խոսք, սակայն ո՞ւմ համար է տիկին Թանդիլյանը դրանք բարձրացնելու: Այն մեծահարուստների, որոնք «շնից մազ պոկելն էլ է քյար» տրամաբանությամբ, տարիներ շարունակ գումարնե՞ր են հափշտակել պետությունից…

Ս.Խաչատրյան