Ռուսաստանում հացահատիկի գնի բարձրացումը կազդի նաև Հայաստանի վրա

Ռուսաստանում արդեն հացահատիկի գնի 26 տոկոսի աճի միտում կա, որը կանդրադառնա նաև մեր վրա: Այս մասին Lurer.com-ի հետ զրույցում ասաց Սպառողների միության նախագահ Արմեն Պողոսյանը:

Հարցին, թե մոտավորապես ազդեցությունը քանի տոկոս կլինի, Արմեն Պողոսյանն ասաց, որ մեզ մոտ տոկոսն ասելը դժվար է, այնուամենայիվ նշեց, որ անկասկած՝ մոտակա ժամանակ 10-20 տոկոսվ կբարձրանա:

Հիշեցնենք, որ ըստ մումուլի հրապարակման, հացահատիկի միջազգային գները կրկին բարձրանում են:

ՌԴ ԶԼՄ-ների փոխանցմամբ, սևծովյան նավահանգիստներում 4-րդ կարգի հացահատիկի մեկ տոննայի գինը հասել է 8900 ռուբլու՝ սահմանելով նոր պատմական ռեկորդ: Ընդամենը 2-3 օր առաջ սա կազմում էր 8100-8300 ռուբլի: Իսկ ընդամենը մեկ շաբաթ առաջ նույն կարգի հացահատիկի տոննան արժեր 7100 ռուբլի:

Հացահատիկի թանկացումը բացատրվում է ՌԴ-ում հացահատիկի սպասվող ցածր բերքով (94 միլիոն տոննայի փոխարեն սպասվում Է 85 մլն տոննա բերք) և Ամերիկա մայրցամաքում հաստատված երաշտով: Միջազգային շուկաներում ռուսական հացահատիկի հիմնական մրցակից ֆրանսիական հացահատիկը ևս թանկացել է՝ հասնելով տոննայի դիմաց 235 եվրոյի: Մեկ շաբաթվա ընթացքում այն թանկացել է մոտ 15 տոկոսով:

Հացահատիկի թանկացմանը, ըստ փորձագետների, հետևելու է մսի ու մսամթերքների թանկացումը: Հացահատիկի 10 տոկոսով թանկացումը հանգեցնում է մսեղենի 3.5-4 տոկոսով թանկացման: