Հեղափոխության առաջին լուրջ ֆիասկո՞ն, թե՞ իրավիճակ, որը ձեռնտու է բոլորին

Վերլուծական 29 Հոկտեմբեր, 2018 19:00

Արդեն պարզ է, որ արտահերթ ընտրությունը կանցկացվի հին օրենսգրքով: Ազգային ժողովում այսօր երկրորդ անգամ տապալվեց նոր օրենսգրքի ընդունումը, որով նախատեսվում էր չեղարկել ռեյտինգային ընտրակարգն ու անցնել, այսպես ասած, մաքուր համամասնականի: Այդպիսով, ընտրությունը կլինի ռեյտինգային ընտրակարգով: Եթե առաջին քվեարկության ժամանակ օրենսգրքի ընդունման տապալման մեղքը ՀՀԿ սաբոտաժի, ինչ-որ տեղ նաև՝ ԲՀԿ պասիվության արդյունքն էր, ապա այսօր իր խոսքն ասաց ՀՅԴ-ն: Բանն այն է, որ հենց ՀՅԴ-ն չի ապահովել այն մեկ անհրաժեշտ ձայնը, որի շնորհիվ դեկտեմբերին քաղաքական ուժերը ընտրությունների կգնային նոր ընտրական օրենսգրքով:

Հասկանալի է, որ եթե Նիկոլ Փաշինյանի համար պրինցիպիալ նշանակություն ունենար հին օրենսգրքով ընտրությունների գնալը բացառելը, ապա նա կապահովեր անհրաժեշտ ձայների քանակը: Փաշինյանի նման պահվածքը տարակուսանք է առաջացրել անգամ նրա թիմակիցների շրջանում: Իրականությունն այն է, որ նոր օրենսգրքի տապալումը ձեռնտու է բոլոր կողմերին, այդ թվում՝ «Ծառուկյան» դաշինքին: Մի կողմից՝ այսպիսով Փաշինյանը ՀՀԿ -ին թեկուզ և չնչին, սակայն շանս է պարգևում, որը ճիշտ օգտագործելու դեպքում այս ուժը կարող է հավակնել նոր գումարման ԱԺ-ում հայտնվել: Մյուս կողմից՝ Փաշինյանը հասկանում է, որ նոր Ընտրական օրենսգիրքը ընդունվելու դեպքում լուրջ գլխացավանք էր դառնալու առաջին հերթին հենց իր համար, հաշվի առնելով Վենետիկի հանձնաժողովի վերապահումները: Այժմ Փաշինյանը կարող է ասել, որ իր կողմից արվել են բոլոր հնարավոր քայլերը, իսկ հակահեղափոխական ուժերն ամեն ինչ փչացրել են: Մյուս կողմից՝ Փաշինյանը հասկանում է, որ այսօր ՀՀԿ ռեյտինգայինները ի վիճակի չեն տոկոսներ խփել, Փաշինյանն ունի բոլոր հնարավորությունները կանխելու՝ հակահեղափոխության ցանակցած դրսևորում:

Սակայն, ինչ խոսք՝ սա շանս է ՀՀԿ-ի համար: Էդմոն Մարուքյանի այսօրվա անչափ նյարդային պահվածքը ցույց է տալիս, որ վերջինս լուրջ մտահոգություններ ունի՝ կապված «Լույս» դաշինքի՝ գալիք խորհրդարանում հայտնվելու առումով: Կարող է ստացվել, որ ընտրությունների արդյունքում ՔՊ-ն կզբաղեցնի առաջին, ԲՀԿ-ն երկրորդ, իսկ ՀՀԿ-ն՝ երրորդ տեղը, այսպիսով, ունենալով լուրջ ընդդիմադիր բևեռ ձևավորելու հնարավորություն: Նման սցենարի դեպքում «Լույսը» պարզապես խաղից դուրս վիճակում է հայտնվելու, ինչը չի կարող չմտահոգել Փաշինյանի երբեմնի դաշնակիցներին:

Ս.Խաչատրյան