«Փաստ». Հայկական լրատվական կայքերի լավագույն հնգյակը՝ ըստ IRI-ի. News.am, Azatutyun.am, 1in.am, ԼՈւՐԵՐ.com, Mamul.am

Այլ 31 Հոկտեմբեր, 2018 10:00

«Փաստ» օրաթերթը գրում է.

Հայաստանում իրականացված թավշյա հեղափոխությունից հետո հեղինակավոր IRI միջազգային հանրապետական ինստիտուտի հետազոտությունների կենտրոնը տարատեսակ հարցումների և հետազոտությունների միջոցով փորձել է պարզել երկրի ապագայի եւ վարչապետ Փաշինյանի կառավարության նկատմամբ Հայաստանում տիրող համընդհանուր տրամադրությունները:

Հետազոտության ենթաբաժիններից մեկն էլ վերաբերել է հայկական մեդիա դաշտին:

IRI-ը հարցում է անցկացրել շուրջ 1.000 մարդու շրջանում, պարզելու համար, թե ռեսպոնդենտները նորություններին ծանոթանալու նպատակով ավելի հաճախ որ կայքերին են հետևում:

Տվյալները հավաքագրվել են 2018 թվականի հուլիսի 23-ից մինչեւ օգոստոսի 15-ը, առանձին-առանձին հարցազրույցների միջոցով:

Հարցման համար ընտրվել է ներկայացուցչական ընտրանք՝ ըստ սեռի, տարիքի և բնակության վայրի: Հարցումների ճշգրտությունը տատանվում է 2 տոկոսի սահմաններում: Հարցումն անցկացվել է համացանցի օգտատերերի շրջանում, որոնց հնարավորություն է տրվել նշելու երեք նախընտրած տարբերակ: Ցուցակը գլխավորում է News.am-ը, 2-րդ տեղում Azatutyun.am-ն է, 3-րդում՝ 1in.am-ը, 4-րդում՝ ԼՈւՐԵՐ.com-ը: Հնգյակը եզրափակում է Mamul.am-ը:

Հարցումը ֆինանսավորվել է ԱՄՆ Միջազգային զարգացման գործակալության կողմից:

Հ.Գ. Հետազոտության սանդղակում նշված է ԼՈւՐԵՐ.am և Shamshyan.am, բայց այս երկու կայքերն էլ գործում են .com տիրույթում իսկ .am տիրույթում նման կայքեր չեն գործում:

Հարցման բոլոր մանրամասներին ծանոթացեք` անցնելով հետևյալ հղումով: