«Կուրսի դոդիկները թող գրքերը վերցնեն, ինձ գումարը տան». Ուսանողի դաժան սպանության գործով դատավճիռ է կայացվել

«Առաջին լրատվական»-ը գրում է.

Երևանի ընդհանուր իրավասության դատարանի՝ Կենտրոն վարչական շրջանի տարածքում գտնվող մասնաշենքում Արշակ Վարդանյանի նախագահությամբ ավարտվել է Կարեն Չատիկյանի գործի դատական քննությունը:

Ըստ մեղադրանքի՝ 2017 թվականի հունվարի 11-ին Երևանի Վարդանանց 28 շենքի բակում գտնվող տաղավարում տեղի ունեցած վիճաբանության ընթացքում Կարեն Չատիկյանը դանակով հարվածել է Ռաֆի Մարտիրոսյանին և Վահե Մուրադյանին, ինչի հետևանքով անչափահաս Ռաֆի Մարտիրոսյանի առողջությանը դիտավորությամբ պատճառել է միջին ծանրության վնաս, իսկ Վահե Մուրադյանին դիտավորությամբ զրկել է կյանքից:

Ըստ մեղադրանքի՝ գործով տուժողներ Ռաֆի Մարտիրոսյանը, Վահե Մուրադյանը, ինչպես նաև գործով վկա մի քանի երիտասարդներ միասին սովորել են Երևանի Շահինյանի անվան ֆիզմաթ դպրոցում, որն ավարտելուց հետո ընդունվել են պետհամալսարանի տարբեր ֆակուլտետներ, մասնավորապես՝ Մարտիրոսյանն ու Մուրադյանն ընդունվել են տեղեկատվական անվտանգության ֆակուլտետ, նրանց ընկերները՝ կիրառական մաթեմատիկայի, ռադիոֆիզիկայի ֆակուլտետներ:

Նրանցից ոմանք մասնակցել են օլիմպիադաների, ստացել են մրցանակներ:

Մասնավորապես՝ Ռաֆի Մարտիրոսյանը հերթական օլիմպիադայում մրցանակ է շահել՝ նրան տրվել է «Բուկինիստ» գրախանութի նվեր-քարտ՝ 10 հազար դրամ գումարով, որով Մարտիրոսյանը կարող էր մասնագիտական և այլ գրականություն գնել:

Երբ նախկին դասընկեր-ներկա ուսանողները հանդիպել են պետհամալսարանում, Մարտիրոսյանը ստացած մրցանակի վերաբերյալ աղջիկներին ասել է, թե նրանց կուրսեցի «դոդիկներին» քարտը կվաճառի 5 հազար դրամով՝ իրենք գրքերը թող վերցնեն, ինձ գումարը տան:

Հիշյալ արտահայտությունը կիրառական մաթեմատիկայի ֆակուլտետում սովորող տղաներից մեկը հայտնել է իր համակուրսեցիներին, որոնցից Կարեն Չատիկյանը առանձնահատուկ վիրավորվել ու ցանկացել է պարզաբանում ստանալ նման արտահայտություն անողից:

Հանդիպումը նշանակվել է Երևանի Վարդանանց 28 շենքի բակում գտնվող բացօթյա տաղավարում 2017 թվականի հունվարի 11-ին, ժամը 14-ի սահմաններում:

Ըստ մեղադրանքի՝ այս հանդիպմանը Կարեն Չատիկյանը գնացել է՝ հետը վերցնելով «թիթեռնիկ» տեսակի դանակ:

Հանդիպման ընթացքում տղաների միջև առաջացել են վեճ ու քաշքշուկ, ապա նրանք սկսել են հարվածել միմյանց, Կարեն Չատիկյանն էլ իր մոտ եղած դանակով մահացու հարվածներ է հասցրել Վահե Մուրադյանին՝ վնասելով նրա սիրտը, թոքը, ու միջին ծանրության վնաս է պատճառել Ռաֆի Մարտիրոսյանի առողջությանը:

Կարեն Չատիկյանին մեղադրանք է առաջադրված ՀՀ քրեական օրենսգրքի 104 հոդվածի 1-ին և 113 հոդվածի 1-ին մասերով: Դատահոգեբուժական փորձաքննության եզրակացությամբ Կարեն Չատիկյանը ճանաչվել է մեղսունակ:

Կարեն Չատիկյանը դիտավորյալ սպանության համար իրեն մեղավոր չի ճանաչել, դատարանում նա առաջ է քաշել անհրաժեշտ պաշտպանության վիճակում կամ անհրաժեշտ պաշտպանության սահմանազանցումով արարքը կատարելու վարկածը:

Մեղադրանքի կողմը պնդել է՝ Չատիկյանի կողմից տուժողներին նպատակաուղղված հարվածներ են հասցվել, ոչ թե դանակն է պատահաբար դիպել թափահարելու ժամանակ, դա հաստատվել է դատաբժշկական փորձաքննության եզրակացությամբ, որտեղ փորձագետը եզրակացրել է, որ հարվածները հասցվել են Վահե Մուրադյանի կենսական կարևոր օրգանի՝ սրտի շրջանին՝որոշակի ուժի ներգործությամբ:

Դատարանում ամբաստանյալի առաջ քաշած վարկածի՝ հարվածների պահին անհրաժեշտ պաշտպանության վիճակում գտնվելու վերաբերյալ մեղադրանքի կողմը պնդել է, որ գործով ձեռք բերված որևէ ապացույցով չի հաստատվել, թե Կարեն Չատիկյանի կյանքին ու առողջությանը տուժողների կողմից իրական վտանգ էր սպառնում:

Գործի քննությամբ հիմնավորվել է՝ Կարեն Չատիկյանը գործել է՝ վիրավորված լինելով «դոդիկ» արտահայտությունից, այդ արտահայտությունն արել էր ոչ թե Վահեն, այլ Ռաֆին:

Ըստ գործի քննությամբ պարզված հանգամանքների՝ Կարեն Չատիկյանն է նախաձեռնել հանդիպումն ու պարզաբանումը, կռվել է, դանակ է հանել, տուժողը, նրա ձեռքին դանակ տեսնելով, ցանկացել է խլել այն, բայց չի կարողացել:

Կարեն Չատիկյանը դանակով մահացու վնասվածք է հասցրել Վահեին, ոտքի շրջանում վնասել է Ռաֆիին՝ նրա առողջությանը պատճառելով միջին ծանրության վնաս, և իր գործողությունները դադարեցրել է անծանոթ անցորդի դիտողությունից հետո՝ անմիջապես դիմելով փախուստի:

Հանդիպման ու պարզաբանման նախաձեռնող լինելը, դանակն իր հետ պարզաբանման տանելը, դանակով հասցված հարվածների ուժգնությունն ու տեղակայումը դիտարկվել են որպես ապացույցներ այն բանի, որ Կարեն Չատիկյանը գործել է Վահե Մուրադյանին կյանքից զրկելու և Ռաֆի Մարտիրոսյանի առողջությանը միջին ծանրության վնաս հասցնելու դիտավորությամբ:

Մեղադրողը միջնորդել էր Կարեն Չատիկյանին մեղավոր ճանաչել մեղսագրված արարքների համար, վերջին հաշվով դատապարտել 11 տարի 6 ամիս ազատազրկման:

Տուժող Ռաֆի Մարտիրոսյանը հայտարարել էր, որ ամբաստանյալ Կարեն Չատիկյանի հետ չի հաշտվում:

Սպանված Վահե Մուրադյանի իրավահաջորդի համոզմունքով՝ ի սկզբանե նախաքննական մարմինը սխալ էր որակել Կարեն Չատիկյանի արարքը, նա պետք է մեղադրվեր ոչ թե պարզապես դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով, այլ՝ ծանրացուցիչ հանգամանքներում՝ խուլիգանական դրդումներով դիտավորյալ սպանության համար՝ ՀՀ քրեական օրենսգրքի 104 հոդվածի 2-րդ մասի 10-րդ կետով:

Տուժողի իրավահաջորդի ներկայացուցիչը շեշտել էր՝ Կարեն Չատիկյանը կյանքից զրկել է բացառիկ օժտվածություն ունեցող, տաղանդավոր տղայի:

Պետական համալսարանից տրված բնութագրի համաձայն՝ Վահե Մուրադյանն անվճար հիմունքներով սովորում էր տեղեկատվության անվտանգության մասնագիտությամբ: Նա համեստ էր, խելացի, տաղանդավոր: Բնութագրում ասված է. «Ոչ միայն ընտանիքն է զավակ կորցրել , զավակ է կորցրել ամբողջ ժողովուրդը»:

Տուժողի իրավահաջորդն ու տուժողի իրավահաջորդի ներկայացուցիչը պահանջել էին, որ դատարանը խստագույն պատիժ սահմանի Կարեն Չատիկյանի նկատմամբ:

Դատարանը եզրահանգել է, որ վեճի ընթացքում տուժող Վահե Մ.-ին կյանքից զրկելու անուղղակի դիտավորության առկայության մասին են վկայում դատաքննությամբ հաստատված մի շարք ապացույցներ: Անհրաժեշտ պաշտպանության վիճակի առկայությունը դատարանը հաստատված չի գնահատել:

Կարեն Չատիկյանը մեղավոր է ճանաչվել ՀՀ քրեական օրենսգրքի 104 հոդվածի 1-ին և 113 հոդվածի 1-ին մասերով:

Կարեն Չատիկյանը վերջին հաշվով դատապարտվել է 10 տարի ազատազրկման:

Ամբողջությամբ՝ ԱՅՍՏԵՂ: