Հանրային խորհուրդը 15 հանձնաժողովներում ընդգրկելու նպատակով ընդունում է դիմումներ

 Հայաստանի Հանրապետության կառավարության որոշմամբ նշանակված Հանրային խորհրդի անդամները նախաձեռնել են 15 հանձնաժողովների ձևավորումը, որպեսզի հասարակական տարբեր կառույցներ ունենան իրենց ներկայացուցիչը հանձնաժողովներում: Lրագրողների հետ զրույցում այս մասին ասաց  Հանրային խորհրդի անդամ  Աշոտ Հակոբյանը:

«Դիմումները ընդունվում են մինչև նոյեմբերի 8-ը: Հանձնաժողովներում ընդգրկված անդամները ներկայացված թեկնածուների կազմից գաղտնի քվեարկությամբ կընտրեն հանձնաժողովի նախագահ: Հանրային խորհուրդն, ընդհանուր առմամբ կունենա 45 անդամ»,-նշեց Հակոբյանը:

Նրա խոսքով՝ կառավարությունը Հանրային խորհրդի միջոցով պետք է զգա ժողովրդի զարկերակը և նույնն էլ ժողովուրդը: «Կառավարությունը պետք է շահագրգռված լինի բոլոր ոլորտներում  հասարակական տրամադրություններ ստուգելու, և թե ինչպիսի արձագանք է տալիս հասարակությունը այս կամ այն հարցի վերաբերյալ: Այս առումով Հանրային խորհուրդը չունի այլընտրանք, չկա որևէ այլ մարմին, որ կարողանա բոլոր ոլորտների համար հարթակ հանդիսանալ: Հույս ունենք,ո ր ներկայիս Հանրային խորհուրդը առավել արդյունավետ կգործի»,- հավելեց Հանրային խորհրդի անդամը: 

«Սինոփսիս Արմենիա» ընկերության գործադիր տնօրեն, Հանրային խորհրդի անդամ ՀովիկՄուսայելյանը նշեց . «Սա լրջագույն հարթակ է, որպեսզի կապը իշխանության և հանրության միջև կայանա, և ինքը՝ հանրությունը, իշխանության վրա ազդելու  լծակներ ունենա: Մեր հիմնական նպատակը մարդկանց իրազեկելն է: Շատ կարևոր է, որ բանիմաց և ոլորտի հետ կապ ունեցող մարդիկ շատ լինեն հանձնաժողովում, և նախագահն էլ ունենա այն հեղինակությունը, որն իրեն թույլ կտա արդյունավետ աշխատել»:

Հանրային խորհրդի կազմում են  Վազգեն Մանուկյանը,  Արմեն Տեր-Տաճատյանը, Անահիտ Աղոյանը, Կառլոս Ղազարյանը, Հովիկ Մուսայելյանը, Հովհաննես Հովհաննիսյանը, Բաբկեն Պիպոյանը, Վարդան Ազատյանը, Հարություն Մեսրոբյանը, Գագիկ Գինոսյանը, Նարինե Խաչատուրյանը (Թուխիկյան), Աշոտ Հակոբյանը,  Յուրիկ Ջավադյանը, Արկադի Տեր-Թադևոսյանը,  Հրանտ Աբրահամյանը: