Հետհաշվարկը սկսվեց. իրական հեղափոխությունը դեռ առջևում է
Վերլուծական
Հայաստանի խորհրդարանը իրավունքի ուժով արձակված է: Սա այլևս պատմական փաստ է և կարելի է ասել, որ հենց այսօրվանից է սկսվելու հեղափոխության ձեռքբերումների կապիտալիզացիան: Արտահերթ խորհրդարանական ընտրությունները լուրջ փորձաքար են դառնալու Նիկոլ Փաշինյանի և նրա թիմի համար, միևնույն ժամանակ՝ փորձաքար են լինելու նաև նախորդ համակարգի համար, որը դեռևս չի ցանկանում վայր դնել զենքերը և գալիք ընտրություններում պայքարելու է ԱԺ-ում կրկին հայտնվելու համար: Փաշինյանն արդեն իսկ հայտարարել է, որ անելու է ամեն ինչ՝ Հայաստանում նախադեպը չունեցող ազատ և արդար ընտրություններ կազմակերպելու համար: Այս դեպքում, եթե նախկին իշխանության ներկայացուցիչները կրկին հայտնվեն ԱԺ-ում՝ Փաշինյանը չի ունենալու մանևրելու որևէ հիմք, քանի որ ակնհայտ է դառնալու նախորդ համակարգի կողմնակիցների իրական թիվը և վերջիններիս աջակցության իրական մակարդակը:
Ընտրություններին ընդառաջ՝ Փաշինյանի առաջնային քայլերից մեկն է լինելու հեղափոխական թիմի նախընտրական ցուցակի ձևավորումը: Բարիկադների ապամոնտաժման քաղաքականությունը, որը որդեգրել է Փաշինյանը, չի բացառում նախորդ համակարգի ներկայացուցիչների՝ ՔՊ ցանկում հայտնվելու հավանականությունը: Նման սցենարի հավանականությունը չի բացառել նաև անձամբ Նիկոլ Փաշինյանը: Անշուշտ, որևէ մեկը չի բացառում, որ անգամ նախորդ իշխանության մեջ եղել են մարդիկ, ովքեր ներքաշված չեն եղել կոռուպցիոն գործարքների մեջ, պահպանել են իրենց բարի համբավը: Սակայն նախորդ համակարգի յուրաքանչյուր ներկայացուցչի՝ ՔՊ ցանկում հայտնվելու, հետագայում նրանց այս կամ այն պաշտոնը տալու դեպքերում Փաշինյանը պարզապես պարտավոր է հաշվետու լինել հասարակությանը: Արդեն իսկ եղել են նմանատիպ նշանակումներ, որոնք առնվազն հասարակության մի ստվար զանգվածի մոտ տարակուսանք են առաջացրել՝ կապված տվյալ գործիչների անցյալի և կենսագրության հետ: Նման դեպքերը պետք է բացառվեն, իսկ համապատասխան գործիչների կենսագրությունը լրջագույն վերլուծության առարկա դառնա և միայն դրանից հետո՝ նրանց բարիկադներից այս կողմ հրավիրելու որոշում կայացվի:
Մյուս կարևոր հարցն այն է՝ արդյո՞ք այս ընտրություններում կխաղարկվի «սևերի և սպիտակների» խաղաքարտը, ինչպես դա եղավ Երևանի ավագանու ընտրությունների ժամանակ: Երկրորդ նախագահ Ռոբերտ Քոչարյանի՝ ընտրություններին մասնակցելուց ձեռնպահ մնալը կարծես թե զրկում է Փաշինյանին այդ հնարավորությունից և այս պարագայում Փաշինյանի թիմի հաղթանակը կարող է ավելի համեստ լինել, քան ավագանու ընտրությունների դեպքում էր, միևնույն ժամանակ, դրանից հաղթանակը պակաս վստահ չի դիտվի:
Մի բան ակնհայտ է ՝ իրական հեղափոխությունը դեռ նոր է սկսվում…
Ս.Խաչատրյան
ՈՒՂԻՂ ԵԹԵՐ
Ամենադիտված 
Մահացել է երգիչ Հովհաննես Գրիգորյանը
