Արամ Մանուկյանը փոշմանել է

Ինչպես հայտնի է՝ «Հայ ազգային կոնգրես» կուսակցությունը որոշել է մասնակցել ԱԺ ընտրություններին, իսկ կուսակցության փոխնախագահ Արամ Մանուկյանը մեզ հետ զրույցում վստահեցրել էր , որ իրենց շանսերը շատ բարձր են գնահատում, քանի որ ունեն թիմ և ասելիք: «Մենք նաև միակ ուժն ենք եղել, որը չի մասնակցել, բայց աջակցել է հեղափոխության ողջ գործընթացին»,-ասել է Արամ Մանուկյանը: 

Սակայն այսօր մամուլում լուրեր տարածվեցին այն մասին, որ ՀԱԿ վարչությունում ԱԺ ընտրություններին մասնակցելու համար 13 հոգի կողմ և 6 հոգի դեմ է քվեարկել: Դեմ քվեարկողների մեջ նշվում է Արամ Մանուկյանի անունը:

Մանուկյանը ԼՈՒՐԵՐ.com-ի հետ զրույցում հերքեց դեմ քվեարկելու մասին լուրերը, նշելով, որ կողմ էլ չի քվեարկել, այսինքն ձեռնպահ է: Մեր այն դիտարկմանը, թե ինչն է որոշման վերանայման հիմք հանդիսացել, քանի որ շատ վստահ էր իրենց ուժերի վրա, Արամ Մանուկյանը խուսափողական պատասխանեց.«Դե չգիտեմ, հստակ չեմ կարող ասել, դեռևս քննարկումների մեջ ենք»:

Իսկ ինչ վերաբերում է այն տեղեկություններին, թե Արամ Մանուկյանն ամեն ինչ անում է, որ իր որդին՝ Արեն Մանուկյանը, խորհրդարանական ընտրություններին ընդառաջ լինի ՔՊ-ի ցուցակում, Մանուկյանը ո′չ հերքեց և ո′չ էլ հաստատեց: «Չեմ ուզում մեկնաբանել, այդ թեմայով հարցեր մի տվեք»,-եզրափակեց Արամ Մանուկյան 

Նշենք, որ Արեն Մանուկյանը Հանուն գիտության զարգացման 2004 թվականի նախաձեռնության անդամ է, ինչպես նաև ՀԱԿ անդամ: Արեն Արամի Մանուկյանը նաև 2013թ մասնակցել է Երևանի ավագանու ընտրություններին Հայ ազգային կոնգրեսի ընտրական ցուցակով՝ զբաղեցնելով 13-րդ հորիզոնականը:

Արմինե Միքայելյան