Վահագն Հարությունյանին կալանավորելու միջնորդությունը քննվում է. ՀՔԾ-ից պարզաբանում են

Երևանի ընդհանուր իրավասության դատարանում այս պահին քննվում է «Մարտի 1-ի» գործով քննչական խմբի նախկին ղեկավար Վահագն Հարությունյանին կալանավորելու մասին քննչական մարմնի միջնորդությունը: Այս մասին ԼՈւՐԵՐ.com-ի թղթակցին հայտնեց Հատուկ քննչական ծառայության մամուլի քարտուղար Մարինա Օհանջանյանը: 

Ի դեպ, այսօր Վահագն Հարությունյանը հայտարարել էր, որ չի ընդունում իրեն առաջադրված մեղադրանքը՝ այն որակելով շինծու և ապօրինի: Այնինչ Հատուկ քննչական ծառայությունից պնդում են, որ կան բավարար ապացույցներ նրան որպես մեղադրյալ ներգրավելու համար: 

«Մշտապես ասվել է, որ անձին որպես մեղադրյալ ներգրավելու հիմքը նրա կողմից հանցանքի կատարումը վկայող արժանահավատ ապացույցների բավարար համակցությունն է: Իսկ այդպիսի ապացույցներ Հատուկ քննչական ծառայությունն ունի»,- մեզ հետ զրույցում վստահեցրեց ՀՔԾ մամուլի քարտուղար Մարինա Օհանջանյանը:

Վահագն Հարությունյանն անդրադառնալով իր նկատմամբ հայտարարված հետախուզմանը՝ նշել էր, որ այն ապօրինի է, ապա ավելացրել, որ ինքն այժմ Մոսկվայում բուժում է ստանում, իսկ իր գտնվելու վայրը հայտնի է եղել ՀՔԾ-ին, հետևաբար ինքը չի կարող հետախուզվել: 

«Մեղադրյալի նկատմամբ հետախուզում հայտարարվում է ոչ միայն նրա գտնվելու վայրը բացահայտելու, այլև նրան վարույթն իրականացնող մարմնին ներկայացնելու համար»,-  պարզաբանեց ՀՔԾ մամուլի քարտուղարը: 

Հիշեցնենք՝ երեկ ՀՔԾ տարածած հաղորդագրության համաձայն, պարզվել է, որ Հարությունյանը, 2007-2011 թվականներին զբաղեցնելով ՀՔԾ հատկապես կարևոր գործերի ավագ քննիչի պաշտոնը, կազմակերպել է ապացույցների կեղծումը, մասնավորապես՝ նպատակ ունենալով թաքցնել 2008 թվականի Մարտի 1-2-ի իրադարձությունների ժամանակ «ՀՀ զինված ուժերի հակասահմանադրական օգտագործման, այդ թվում՝ զինված ուժերի ծառայողների կողմից հրազենի ապօրինի գործադրման իրական հանգամանքները»: