«Ով կար՝ ասել եմ». գործարարն էլ ոչ մի անուն չի հնչեցնի

Վերջին շրջանում կաշառքի վերաբերյալ «գործ տվող» գործարար Սիլվա Համբարձումյանն օրեցօր նորանոր անուններ է հնչեցնում, որոնց բազմամիլիոնանոց կաշառքներ է տվել՝ իր այս կամ այն գործը առաջ տանելու համար: Այս հանգամանքը Համբարձումյանը պատճառաբանում է՝ «այն  ժամանակ ընդունված էր այդպես լուծել հարցերը»: Իսկ քննադատություններին, թե կաշառք տալը ևս հանցագործություն է, Համբարձումյանը լոզունգ սարքած արտահայտությունն է կրկնում, թե ինքը կաշառք տվել է 2008թ., իսկ կաշառք տալը հանցագործություն սկսել է համարվել 2011թ.-ից:  

Այսօր էլ մամուլում տեղեկություններ եղան այն մասին, որ գործարարը կաշառքի վերաբերյալ հերթական հաղորդումն է տվել՝ նշելով ՀՀ նախկին արտգործնախարար, ԱԺ նախկին պատգամավոր Վարդան Օսկանյանի անունը:

ԼՈւՐԵՐ.com-ի թղթակիցը տեղեկությունը ճշտելու համար կապ հաստատեց Սիլվա Համբարձումյանի հետ, սակայն վերջինս հերքեց այն՝ ասելով, որ Օսկանյանի մասին խոսակցություն չկա. «Օսկանյանի հետ մենք առերեսվել ենք մի հարցով՝ արաբներին ինքն ասել էր, որ Հայաստանում ներդրումային պայմանները շատ լավն են: Ընդամենը դրանով ենք առերեսվել, իսկ Օսկանյանն էլ շատ վաղուց գտնվում  է Միացյալ նահանգներում»,- ասաց նա:

Կա՞ն այլ անձինք, որոնց ևս կաշառք է տվել, և որոնց անունները առաջիկայում հնարավոր է՝ հնչեցնի, Համբարձումյանը պատասխանց. «Չէ՛, չկա՛: Ով կար՝ ասել եմ, այլևս ոչ ոք չկա»: 

«Արամ Հարությունյանի դեմ, այո՛, ես եմ տվել հայտարարությունը: Իսկ մյուսներին՝ Ռոբերտ Քոչարյան, Սերժ Սարգսյան, Արմեն Գևորգյան՝ դա եկել է Քոչարյանի մերձավորներին ստուգելիս: Ինձ էլ էին կանչել, քանի որ ես էլ էի Մայրապետյանին փոխանցել 2 մլն դոլար»,- ասաց Համբարձումյանը:

Հարցին՝ խոսակցություններ կան, որ այս պահին արված հայտարարություններն ու կաշառքների վերաբերյալ այսքան տարի հետո բարձրաձայնելը նոր իշխանությունների հետ հանցավոր համագործակցության հետևանք է, Համբարձումյանը փորձեց վստահեցնել, որ նոր իշխանությունների հետ ինքն ընդհանրապես կապ չունի:

Սակայն հաշվի առնելով ու հակադրելով  գործարարի սկանդալային հայտարարություններն ու անպատժելիությունը, կարելի է ենթադրել, որ Համբարձումյանը նոր իշխանություններից երաշխիքներ է ստացել, որ կներգրավվի որպես տուժող՝ ինչպես և է այս պահին:

Սոնա Հարությունյան