Պայքար «հողմաղացների» դեմ. գլխավոր խնդիրը դեռևս լուծված չէ
Վերլուծական
Երեկ կոռուպցիոն հերթական բացահայտմանը ականատես եղանք: Ոստիկանության կազմակերպված հանցավորության դեմ պայքարի գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչությունը ՀՀ աշխատանքի և սոցիալական հարցերի նախարարության Շենգավիթի տարածքային սոցիալական ապահովության բաժնի աշխատակիցների է ձերբակալել: Ընդ որում. ուշագրավ է, որ այս նույն բաժին իրավապահները արդեն երկրորդ անգամ են այցելում. առաջինը այս տարվա օգոստոսին էր, երբ կրկին կաշառք ստանալու մեղադրանք էր ներկայացվել տվյալ բաժնի տարածքային ստորաբաժանման պետին:
Նիկոլ Փաշինյանը պարբերաբար հայտարարում է, թե Հայաստանում կոռուպցիան այլևս արմատախիլ արված է և կարելի է Նոր Հայաստանում մոռանալ նման երևույթի գոյության մասին: Սակայն նման հայտարարություններին զուգահեռ, գրեթե յուրաքանչյուր օր կոռուպցիոն այս կամ այն գործարքի բացահայտման մասին ենք տեղեկանում, որոնց մի մասը, ի դեպ, տեղի է ունեցել հենց Նոր Հայաստանում, ասել է թե՝ որոշ մարդկանց համար երկրում այդպես էլ իրավիճակ չփոխվեց:
Հատկանշական է նաև, որ միջազգային հեղինակավոր Transparency international-ը որևէ փոփոխություն չի նկատել Հայաստանում կոռուպցիայի ընկալման ինդեքսում: Ստացվում է՝ Փաշինյանի արձանագրած ջախջախված կոռուպցիան չեն նկատում ո՛չ հայաստանյան հանրությունը, ո՛չ միջազգային կազմակերպությունները: Այս համատեքստում հարկ է նշել, որ նույն Transparency international-ը Վրաստանում և Ուկրաինայում տեղի ունեցած թավշյա հեղափոխություններից հետո շատ կարճ ժամանակահատվածում արձանագրել է տվյալ երկրներում կոռուպցիայի դեմ պայքարում գրանցված հաջողությունները՝ գործնականում: Իհարկե, կազմակերպության օբյեկտիվությունը շատերի մոտ կարող է հարցեր առաջացնել, սակայն պետք է ընդունել, որ ներկայացված զեկույցները ուղեցույց և ցուցիչ են հանդիսանում հատկապես պոտենցիալ ներդրողների համար: Եթե մեր երկրում կոռուպցիայի դեմ պայքարը ընթանում է միայն բաժակաճառերի մակարդակում, եթե յուրաքանչյուր օր կաշառակերության դեպքեր են արձանագրվում ՊԵԿ-ում, սոցապում, ՊՌԱԿ-ում, եթե շատերը իներցիայով շարունակում են գործել հին Հայաստանին բնորոշ արժեհամակարգերի դաշտում՝ պետք չէ զարմանալ, որ ներդրողները սպասողական վիճակում են…
Ս.Խաչատրյան
ՈՒՂԻՂ ԵԹԵՐ
Ամենադիտված 
Սոչի մեկնող ինքնաթիռը ճանապարհին անցկացրել է մեկ օր, սակայն տեղ չի հասել
