Կարգելվի՞ Ասյա Խաչատրյանի մուտքն Արցախ

Սոցիալական ցանցերում հերթական բուռն քննարկումն է սկսվել կապույտ մազերով հայտնի Ասյա Խաչատրյանի շուրջ։ Բանն այն է, որ համացանցում էին հայտնվել նրա և ադրբեջանցի երիտասարդի լուսանկարները, որտեղից պարզ էր դարձել, որ նրանք Վրաստանում են։ Ադրբեջանցի օգտատեր՝ Tehran Libre-ի էջն ուսումնասիրելիս հայտնի էր դարձել, որ նա Ադրբեջանի ներքին զորքերի կամ պետական անվտանգության ծառայության զորքերի զինծառայող է, որն ունի հակահայկական տրամադրվածություններ։ Ոմանք սուր քննադատություններ, ոմանք էլ՝ պաշտպանական ճառեր էին հնչեցնում այս ամենի վերաբերյալ։

ԼՈւՐԵՐ․com-ի թղթակցի հետ զրույցում Արցախի նախագահի մամուլի խոսնակ Դավիթ Բաբայանն անդրադառնալով այս իրադարձություններին նշեց, որ պատերազական իրավիճակում գտնվող երկրի համար հարկավոր է խնդիրը դիտարկել այլ տեսանկյունից․ «Բարեկամությունը լավ բան է, այն ոչ մի սահման չի ճանաչում՝ ոչ ազգություն, ոչ կրոն, ոչ տարիք։ Թեև մենք մշտապես ասել ենք, որ հասարակություններն էլ պետք է իրար հետ հարաբերություններ պահպանեն, որպեսզի հակամարտությունը չվերածվի ազգային թշնամանքի, բայց պետք է հասկանալ՝ ի՞նչ է թաքնված այդ հարաբերությունների հետևում։ Հանրային կարծրատիպերը կոտրելու համար ընկերություն անելը սխալ է: Երբ այդ ամենն արվում է PR-Ի համար, հակառակ ազգային ավանդույթների՝ նշանակում է ինչ-որ նպատակներ է հետապնդում։ Հարկավոր է հասկանալ նաև՝ արդյո՞ք մյուս կողմն էլ է այդպես մտածում և արդյոք չի՞ փորձում օգտագործել այդ ընկերությունը ինչ-որ նպատակներ իրագործելու համար»,- ասաց Բաբայանը։ 

Օգտատերերի զայրույթը հասավ նրան, որ սկսեցին գրառումներ կատարել, որ Արցախի իշխանությունը չպետք է թույլ տա Ասյա Խաչատրյանի մուտքը Արցախ: Խոսելով Արցախի իշխանության տրամադրվածությունների մասին՝ Բաբայանը նշեց, որ ստեղծված իրավիճակի գնահատականը պետք է տան պատկան մարմինները․ «Նրանք պետք է զբաղվեն դրանով, քանի որ սա յուրահատուկ իրավիճակ է․ մենք Ադրբեջանի հետ գտնվում ենք պատերազմական իրավիճակում։ Այդ տղան աշխատում է ոստիկանությունում և չի բացառվում, որ կապված է հատուկ ծառայությունների հետ»,- նկատեց նա։

Նշենք, որ դեռևս ամիսներ առաջ Ասյա Խաչատրյանը հայտարարեց, թե առանց որևէ պատճառի ոստիկանները իրեն տարել են բաժին և սեռական բնույթի հայտարարություններ են հնչեցրել իր հասցեին միայն նրա համար, որ նա ունի կապույտ մազեր և արտասովոր տեսք։ Հարցին՝ հնարավո՞ր է նրա մասնակցությամբ Արցախում տեղի ունեցածն կազմակերպված էր ադրբեջանական ուժերի հետ, Բաբայանը նշեց․ «Մենք դրան իրավական գնահատական տվել ենք։ Ամեն ինչ իրավական հարթության վրա պետք է լինի, որպեսզի սուբյեկտիվություն չլինի և ըստ դրա քայլեր ձեռնարկվեն։ Որպես անհատ շատ մեծ կասկածներ ունեմ Ադրբեջանի քաղաքականության, և նրանց կողմից իրականացվող աշխատանքների վերաբերյալ, բայց դա իմ անձնական տեսակետն է»,- եզրափակեց Արցախի նախագահի մամուլի խոսնակը:

Սոնա Հարությունյան